Pynithuh ka NPP Amlarem ia 3 ngut ki kyrtong na War Jaintia ha ka jingjied nongkitkam

Syllad | The Rising MeghalayaDecember 23, 2024

Ka General Meeting jong ka National People’s Party (NPP) Amlarem Block kaba la long ha ka 17 tarik u Nohprah 2024 ka la ioh ban jied ia ki nongkitkam jong ka party bad ka jingpynithuh ia ki laingut ki kyrtong jong ka party napoh War Jaintia.

Ha kane ka jingialang ba la pynlong hapoh Krangpamtadong LP School, Amlarem ki la don da ki spah ngut kiba la wan iashim bynta naduh ki riew rangbah, ki longkmie bad ki samla.

U Bah Stephanson Mukhim MLA barim bad adhoc President jong ka party uba la pyniaid ia ka jingialang u la ai khublei ia baroh ki nongkitkam jong ka party  hapoh ka Amlarem constituency. 

Ha kane ka jingialang da kawei ka sur ka la pynskhem ia u Bah Stephanson Mukhim ban long kum u President ba thymmai ka party hapoh Amlarem Constituency bad ia ka kam General Secretary la pynkhamti ha u bah Reachingson Kongwang.

Nalor u President bad General Secretary kiwei pat ki dkhot ba la jied ha kane ka sngi ki kynthup ia u Working President Bah Holano Lamin bad Bah Het Pohthmi, Vice President Bah Wonly Chyrmang bad Bah Heimon Shylla, Asst. Secretary Bah Sikil Chyrmang bad Bah Ailad Surong, Treasurer Bah Jesper Tongper, Office Secretary Bah Twin Nyallang, Org. Secretary Bah Prolin Langshiang, Publicity Secretary Bah Platini Mukhim, Adviser Bah R.L Tariang bad Bah Gilroy Tariang.

Katba ia ka National People’s Youth Front (NPYF) Youth Wing la shaniah ha u Bah Wanri Tariang bad Bah Jinesh Lamin Gashnga ban pynbeit ia ka jingialang pynthymmai Nongkitkam.

Kumjuh ia ka Womens’ Wing la shaniah ha I Kong Mandarita Pohplet bad Kong Ferina Mynthong ban pynbeit ia ka jingialang pynthymmai Nongkitkam.

Ha kane ka sngi la ioh ruh ban pynkha thymmai sa ia kawei ka tnat treikam ka party, ka Farmer’s Wing, bad la jied ia u bah Lah Pohktai kum u President bad bah Omin Pohlong kum u Secretary.

Hadien ka jingpynskhem ia ki nongkitkam ba thymmai ka party, la ioh ka jingkren ha kaba iadei bad ka elekshon MDC ka ban wan da kaba la ai jingmut ban pynkhlain shuh shuh ia ka party.

Ha kane ka jingialang la pynithuh ruh ia u kyrtong ba thymmai na War East, u Bah Wonly Chyrmang uba ha ka jingkren u la pynpaw ka jingsngewnguh ia u Blei Trai kynrad uba la btin lynti ha ka jingiaid lynti ka jingim jong u, bad u la ai khublei ruh ia ka party kaba la ibit ia u ban long u kyrtong ha ryngkat ka jingkyrpad ia ki paidbah na War East ban ai ka jingkyrshan ha kane ka elekshon MDC ka ban wan.

Nalor kata la ioh ruh ban leh burom bad kitbok kitrwiang ia baroh 3 ngut ki kyrtong MDC ka party kiba kynthup ia u Bah Het Pohthmi  na War West, Bah Holando Lamin  na War Central bad  Bah Wonly Chyrman na War East da kaba pyndeng da ki jain tawah jong  ka party bad ki kyntien kyrkhu na I Bah Stephanson Mukhim, President ka party.