Pynjari Curfew bad yn dain kuna ia kiba pynkhein aiñ: DM Khliehriat

Syllad | The Rising MeghalayaJuly 12, 2020

U District Magistor, East Jaintia Hills District hadien ka jingkiew ka jingiabit khlam haka Jylla bad ka jingbit khlam ki ar ngut kaba kynthup ia u pulit bad u branch manager ka bank SBI ha East Jaintia Hills District ula pynjari da ka kyndon aiñ 144 CrPC ha baroh kawei ka District.

Ha kane ka hukum kaba ula pynmih la bthah ia baroh ki nongshong shnong jong ka East Jaintia Hills District ba ki dei ban deng ia ki Mask ha ki jaka paidbah, ban kiar iwei na iwei pat (social distancing) ha baroh ki jaka paidbah, ban sait bha ki kti ki jong ki daka sabon bunsien haka shisngi ne da ki sanitizer bad ruh ban pynkhuid bha (disinfect) ia ki jaka sah, dukan ne kino kino ki jaka paidbah ne jaka la jong.

Katkum ka hukum kaba ula pynmih ba kino kino kiba pynkhein ïaka hukum bad ka jingbthah yn dain da ka kuna kaba 500 tyngka haka sien kaba nyngkong.

La aibor ia ki pulit ban shain kuna (fine) ia kiba leh pyrshah haka sien nongkong yn dain kuna T.500 bad haka sien kaba ar ka kuna kanlong arshah ne laishah lada lap ïa kiba pynkhien ia kane ka hukum bad ban ai mukotduma ne register case pyrshah iaki da kaba pyngngat hapoh ka kyndon aiñ jong ka Section 51 jong ka Disaster Management Act, 2005.

Kane ka jingpynjari u magistor ia kane ka hukum 144 CrPC kalong shi bynta ban tem iaka jingpur bad ka jingiabit khlam COVID-19 bad kadei ruh katkum ka jingbthah ka tnad Health & Family Welfare Department da kaba pule lang bad ka Regulation 3 jong ka Meghalaya Epidemic Diseases COVID-19 Regulation 2020 bad kyndon No.5 (1) jong ka Order jong ka Sorkar India.