Pynjari ka Sorkar Jylla da ka korphiw miet ha khappud namar ka jingiaumsnam ha Bangladesh

Syllad | The Rising MeghalayaAugust 5, 2024

Ka Sorkar Meghalaya ka la shim ia ka rai ban pynjari mardor da ka kophiw miet ha baroh shilynter ki jaka khappud bad ka Bangladesh namar ka jingiaumsnam kaba jur ha kane ka ri ba marjan.

Ia kane la pyntip da u Symbud Myntri Rangbah ka Jylla uba khmih ia ka tnad Home (Police) u Bah Prestone Tynsong hynne ka 5 tarik hadien ka jingialang bad u Chief Secretary, Director General of Police bad u Inspector General ki BSF ban iakren halor ka jinglong jingman hapoh Bangladesh.

“Kum ki lad jingiada ban khmih na ka bynta ka bha ka miat jong ka Jylla bad ka Ri hi baroh kawei, hynne ka sngi Nyngkong ngi la shim ia ka rai ban pynjari da ka korphiw miet ha shilynter ki jaka khappud bad ka Bangladesh ka ban sdang naduh mynta hi ka sngi,” ong u Myntri.

U la ong ruh ba kane ka korphiw miet ka ban sdang treikam naduh ka por 6 baje janmiet haduh 6 baje mynstep man ka sngi kan treikam tang ha ki jaka kiba hap hapoh ka 200 mitar na u zero line da ka jingthmu ban khanglad ia ka jingwan rung jong ki nong Bangladesh sha kane ka Jylla.

U Bah Tynsong u la ong, “Nga kyrpad ia baroh ki nongshong shnong ka Jylla khamtam kito kiba shong ba sah ha ki thain khappud ba kin iai shah bad ka sorkar halor kane ka jingpynjari korphiw.Kumba Nga ong ngim pat tip bniah ia ka jinglong jingman ha Bangladesh, kumta Nga kwah ban kyrpad khamtam ia kito kiba don ha ki thain khappud ba kin ai ka jingiatreilang bad ruh ban long kiba kloi ban ai ia kino kino ki jingtip kiba ki ioh pdiang sha ki bor sorkar kumjuh sha u IG ne ki BSF kiba don ha ki thain khappud.”

Haba kylli, u Symbud Myntri u la pyntip ba ka sorkar Pdeng ka la dep ban phah 9 battalion ki BSF sha baroh ki jaka khappud khnang ban pynkhlain ia ka jingpahara hadien kane ka jinglong jingman hapoh kane ka ri ba marjan.

“Na ka liang ka tnad kam Pohiing jong ka ri ka la pynthikna ruh ban phah shuh shuh ia ki bor pahara hadien ba ka jinglong jingman ka la kham jur ha katei ka ri.Ngi la bthah ia u DG ba un bteng ban aijingtip sha ka sorkar Jylla lada ki donkam ia ka jingiarap ha ka liang ki bor pahara ne kiwei pat, ngi long kiba kloi ban ai ia ka jingkyrshan,” ong u Bah Tynsong. 

Nalor kata u la ong ruh, “Ngim don shuh ia ki samla pule kiba dang sahkut. Ainguh ia U Blei ba ia baroh ki samla pule la lah ban pynkynriah sha Meghalaya bad sha kiwei ki bynta jong ka ri India.”

Shuh shuh u la ong ruh ba ka Sorkar Jylla kala pyntreikam bad pyrkhing bha ia ka Foreigners Act da kaba pynphai ne pynngat ia ki bar ri kiba wan rung beain.