Pynjari kyndon 144 CrPC u DM ha ka sngi niew vote ban pynthikna ia ka suk ka sain

Syllad | The Rising MeghalayaMay 24, 2024

U District Magistrate ka East Khasi Hills u SC Sadhu ha ka 23 tarik Jymmang, u la pynjari da ka kyndon 144 CrPC na ka bynta ka 4 tarik u bnai Jylliew u ban wan kaba dei ka sngi niew vote na ka bynta ka election Lok Sabha khnang ban pynthikna ban pynneh ia ka shongsuk shongshngain.

Katkum kane ka hukum la maham ban pynlong ia kano kano ka jingiaid proseshon ne rally, ia kino kino ki jingpyrta slogan hapoh ki jaka ba la pynlong ia ka jingniew vote tad haduh ban da pyndep ia ka jingniew ia ki vote bad ban pynbna ia ka resulut.

Nalor kata la khang pyrshah ban pyndonkam ia kino kino ki tynghung pynsawa bad ki jingialehkmen da kano kano ka seng sain pyrthei ne kyrtong hajan ka jaka ba pynlong ka jingniew ia ki vote.

La khang pyrshah ruh ban rah i ki dieng ne siej kiba sieh ia ki lama ne khlem lama, ki tiar ba pynmih ding, jingiaid proseshon lane ban ialum paidbah hapoh ka shi kilomitar pyllun na ka jaka niew vote. La khang pyrshah ruh ban pynbthei pataka ha ki surok bad ha ki jaka paidbah ha katei ka sngi niew vote.

Yn ym shah ruh ia kano kano ka jingiaid proseshon ne rally da kino kino ki kyrtong ne party sain pyrthei hadien ba la pynbna ia ka result hapoh East Khasi Hills District.

Nalor kata ka hukum ka la ong ruh ba yn ym shah palat ia ka arngut ki briew ki ban synran ia ki kyrtong kiba jop katkum ka jingai jingbit ka jong u/ka na ka bynta ban pdiang ia ka certificate jong ka election na ki Returning Officer.

Hapoh ka hall ba pynlong ia ka jingniew vote yn shah rung tang ia kito ki briew kiba don ia ki ID card kiba biang, Car Pass ba la ai da ka District Election Officer, EKH bad yn ym shah ban rah Mobile Phone ne camera hapoh ka hall ba pynlong ia ka jingniew vote.