Pynjari kyndon 144 CrPC u DM ka West Jaintia Hills namar ka election Lok Sabha | Pule ia kiei kiba khang pyrshah

Syllad | The Rising MeghalayaMarch 18, 2024

Hadien ka jingpynbna ia eleection Lok Sabha 2024 ha ka jylla Meghalaya ka ban long ha ka 19 tarik u Iaiong 2024, bad ka jingtreikam mardor jong ka Model Code of Conduct, nakaliang u District Magistrate ka West Jaintia Hills District u Bah B S Sohliya IAS u la pynmih ia bun tylli ki hukum khang pyrshah hapoh ki kyndon 144 CrPC na ka bynta ban pynlong ia ka ilekshon kaba iaid beit iaid ryntih.

Katkum kane ka hukum la khang pyrshah ia kino kino ki jingthoh, ki jingtah postar ha ki kynroh la ha kino kino ki rukom, ki jngwah banar bad kiwei pat ha ki jaka paidbah bad ki jingtei kiba dei jong ki paidbah. La khang pyrshah ruh ban leh ia kine ha kino kino ki jingtei ne ki kynroh jong ki riew shimet khlem da ioh ia ki jingbit na ki trai iing, bad ka jingmynjur kaba khatduh kan long lyngba ka ophis jong u District Magistrate, West Jaintia Hills.

La khang pyrshah ban pynlong ia kino kino ki rally ne procession khlem ka jingioh jingbit na u District Magistrate,

Nalor kata la khang pyrshah ban pynlong ia kino kino ki jingialang elekshon khlem da ioh jingbit na ka ophis u District Magistrate bad ruh na ki Rangbah Shnong ha kaba iadei bad ka jaka pynlong jingialang.

Nalor kata la khang pyrshah ruh ban pyndonkam ia ki tynghung pynsawa ne PA System hapdeng ka por 10 baje mynkiet haduh 6 baje mynstep, bad lada don kiba pyndonkam ia kine ki kor pynsawa khlem ka jingioh jingbit na ka ophis u District Magistrate na ka liang ki bor ba dei khmih kin kurup noh mardor ia kine ki tiar pynsawa.

Ha kawei pat ka bynta na ka liang u District Magistrate u la hukum ruh ia baroh kito kiba buh ia ki tiar siat laisen hapoh ka District ba kin wan aiti noh ia ki ha ryngkat ki Xerox copy jong ki laisen sha ki Police Station, out post jong ki na ka bynta ka jingshngain bad ia kiba yn sa pynphai pat hadien kane ka ilekshon Lok Sabha.

Shuh shuh une u heh ka district lyngba kane ka hukum u la khang pyrshah ruh ban rah ia kino kino ki tiar siat, hynrei kan kan ym treikam na ka bynta ki bor pulit bad kiwei pat ki Tnat pahara kiba don hapdeng jong ka kam katkum ka ain.