Pynjari kyndon 163 BNSS ha Jowai, kiei ki kyndon ba ki kyrtong & paidbah ki dei ban bud ryntih; pule hangne

Syllad | The Rising MeghalayaFebruary 22, 2025

U District Magistrate ka West Jaintia Hills, A.K. Singh, IAS, u la pynjari da ka kyndon aiñ hapoh ka Section 163 Bharatiya Nagarik Suraksha Sahita (BNSS), 2023, ban pynthikna ba ka jingniew vote jong ka Jaintia Hills Autonomous District Council (JHADC) ha DC ophis kan long kaba iaid beit iaid ryntih ha ki jaka niew vote.

Katkum ka hukum, ka jingniew vote la pynbeit ba kan long haka 24 tarik Rymphang bad kan sdang naduh 8 baje mynstep haduh bala dep ka jingniew iaki vote.

Kumta ka 200 metre sawdong jong ka DC ophis ne jaka niew vote la pyrkhing bha iaka iaid ka ieng ki briew. Bad tang kiba don iaki pass bad ki ID Card kiba la ai da u Returing Officer kiba ioh ban rung haka 200 metre sawdong ka DC ophis.

Kane ka hukum ka khang pyrshah ia ka jingrung ki briew haka Counting Centre, ka jingrung kali hapoh u pud 200 metre ka jingjngai na DC ophis, ka pyndonkam ia ki kor pynsawa, ka jingpynieng kali klumar haka surok National Highway 40E, bad ki surok shnong.

Nalor kata, la khang pyrshah ruh ban rah tiar pynmynsaw/ki jingdih pynbuiad da kino kino ki nongkyrshan jong u candidate ne ban thaw kino kino ki jingklumar kiba la thmu lypa.

La khang ruh ban pynlong rally da ki kyrtong kiba jop haduh 48 kynta hapoh 200 metre ka jingjngai na ka jaka niew votes hadien bala dep pynbna iaka result.

Ka hukum ka khang ruh ban lum paidbah palat san ngut na ka jaka niew vote marsien pyndep iaka jingniew vote.