Pynjari kyndon ka DM-EKH ba pyniap pathar ia ki doh um ha wah Umsong, Pynursla

Syllad | The Rising MeghalayaNovember 16, 2024

Hadien ba ka la don biang ka jingud jingnam na ka liang ki paidbah halor ka jingdon jong ki briew kiba pyniap dusmon ia ki dohkha dohpnat da kaba pynbthei bom, wieh dawai, khang jar, den sla, pynap kriah khongpong, pynap khoh ka, sdad um, pynap bilor, tbet torchlight, tong tynsong por mynmiet, khang kwar, bret jar bad kiwei kiwei ki rukom khwai doh kiba pynsaja ia ki doh um doh wah bad ki kynja ba im hapoh ka wah Umsong kaba hap hapoh Pynursla Civil Sub Division, East Khasi Hills District, kumta ruh na ka liang ka ka District Magistrate ka East Khasi Hills District, ka Kong RM Kurbah ka la pynjari mardor da ka kyndon Section 163 BNSS. 

Lyngba kane ka kyndon la pynbna paidbah ba la khang bad mana tyngeh ban pyndonkam ia kitei ki rukom khwai kiba buh jingma na ka jingduh jait jong ki dohkha dohpnat bad kiwei pat ki jingthaw ba im kiba don hapoh kane ka wah Umsong bad kaba buh jingma ruh ia ka koit ka khiah jong ki paidbah.

Ha kajuh ka por ka District Magistrate ka kyntu ruh ia ki bor shnong bor thaw ba lada ki lap ne tip ia kino kino kiba leh ia kiba kum kine ki jait kam ba la kdew haneng ki dei ban pyntip mardor sha ka ophis khnang ban shim ia ki lad jingpynshitom katkum ka ain.

Kane ka hukum kan treikam mardor naduh ka 14 Naiwieng 2024 tad haduh ban da pynbna da kumwei pat.