Pynjari Night Curfew ha khappud Indo Bangladesh ha ki ar tylli ki district jong ka rilum Jaintia

Syllad | The Rising MeghalayaAugust 5, 2024

Ban khanglad ia kano kano ka jingiaid sha shiliang pud kiba pyrshang ban rung beain sha India kynthup naduh ki seng lehnoh, ki nongkhaii tuh bad kino kino ki kam be-ain ha khappud Indo-Bangladesh namar ka jingklumar ha Bangladesh, ki District Magistrate jong ki ar tylli ki distrik ha khappud bad ka ri Bangladesh kata ka East Jaiñtia Hills District bad ka West Jaiñtia Hills District ki la pynjari ïa ka pakhang miet katkum ka kyndon 163 BNSS naduh ka por 6 baje janmiet haduh ka por 6 baje mynstep haduh 200 meter na u Zero Line (International Border).

Katkum ka hukum u District Magistrate jong ka East Jaintia Hills u Shivansh Awasthi, IAS, la ong ba kane ka Curfew miet ka khang pyrshah ia ka iaid ka ieng jong ki briew ha khappud da ka jingthmu ban kyntur lane ban rung tuh sha ki jaka jong ka ri India.

Kane ka hukum ka khang pyrshah ruh ïa ka jingïaid proseshon khlem jingbit ne ka jingïalang jong ki 5 (san) ngut ne tam bad ban rah iaki tiar kiba lah ban pyndonkam kum ki tiar pynmynsaw kynthup ïa ki dieng bad ki maw hapoh bad sawdong jong u pud u sam ka Indo- Bangladesh.

La khang ruh iaka jingkhaii tuh ia ki masi, ki mar ba la khang pyrshah bad kiwei kiwei hapoh kane ka hukum.

U Awasthi ula pynskhem ba ka jaka khappud ha East Jaintia Hills ka long kaba khlem jingker ka long kaba lah ban wan rung tuh da ki nongwan buhai shnong be-aiñ, ki dkhot jong ki kynhun seng lehnoh kiba don ka jingïadei bad ki kynhun pyrshah ri kiba lah ban ïalum hajan khappud ha ka por miet ban bteng ia ki kam sniew jong ki.

Katba u Bah BS Sohliya, IAS, District Magistrate jong ka West Jaiñtia Hills District, Jowai u la khang ïa ka iaid ka ieng jong ki briew ha khappud India Bangladesh da ka da ka jingthmu ban kyntur lane rung tuh sha ka ri India.

Kane ka hukum ka khang ïa ka jingïaid proseshon khlem jingbit ne ka jingïalang jong ki 5 (san) ngut ne tam bad ban rah ïa ki tiar kiba lah ban pyndonkam kum ki tiar pynmynsaw kynthup ïa ki dieng, ki maw hapoh bad sawdong jong ka Indo Bangladesh Border.

Kane ka hukum ka khang ruh ïaka jingkhaïi tuh ïa ki masi, kumjuh u sohjew, tympew, dohkha tyrkhong, biri, sikret, slasha bad kiwei kiwei.

U Bah Sohliya ula pyntip ba ka thaiñ khappud ha West Jaiñtia Hills District ka long kaba khlem jingker ka long kaba lah ban ïoh rung tuh ki nongwan buhai shnong be-aiñ, ki kynhun seng lehnoh kiba don ka jingïadei bad ki kynhun pyrshah ri kiba lah ban ïalum ha khappud ha ki por miet ban bteng ia ki kam sniew jong ki.