Pynjari President Rule ha Manipur hadien ka jingiehnoh kam u Myntri Rangbah ka Jylla

Syllad | The Rising MeghalayaFebruary 13, 2025

Ka Sorkar Pdeng hynne ka sngi 13 tarik Rymphang ka la pynjari da ka synshar president ne ‘President’s Rule’ ha Manipur, kaba la pynkut noh ia ki taiew jong ka jingbym thikna hadien ka jingiehnoh kam jong u Myntri Rangbah ka Jylla u N. Biren Singh.

Kane ka jingshim rai ka la wan long ruh hapdeng ka jingiakynad jaidbynriew kaba dang iai bteng bad ka jingbym lah jong ka BJP ban jied ia u nongialam bathymmai kaba la pynlong ia ka synshar khadar ba kan don hapdeng ka jingklumar.

Kane ka jingpynjari ia ka Article 356 ka la wan long ruh tang saw sngi hadien ba u Biren Singh u la hiar shuki noh ha ka Sngi U Blei ba la lah hadien ka jingialang bad u Myntri ka Sorkar Pdeng u Amir Shah.Ka jingiehnoh kam jong u Singh, kata hadien jan 21 bnai jong ka jingkhie jong ka jingiakynad jaidbynriew, ka la wan long ruh hadien ka jingmih jong ka jingiapher jingmut hapoh ka seng BJP ha Manipur bad ka jingma kaba lah ban mih halor ka jingbym ioh ia ka jingshaniah hapoh ka iingdorbar thaw ain ka Jylla.

Lah ban kdew ba ka jingiaumsnam na ka jingsngew iapher jaidbynriew hapoh Manipur ka la shim ia ka jingim jong palat 250 ngut ki briew bad pynkylla sakma da ki hajar ngut kiwei pat.

Ha ka jingpynbna ba pura jong ka, ka Ministry of Home Affairs (MHA) ka la ong, “Katba ma nga, ka Droupadi Murmu, President ka Ri India nga la ioh pdiang ia ka kaiphod na u Lat ka Manipur, bad hadien ba nga la bishar ia ka kaiphod bad kiwei kiwei ki jingtip, nga la sngewhun ba ia ka sorkar Manipur ym lah ban pyniaid katkum ki riti synshar jong ka Ri. Mynta namar kata haba pyndonkam ia ka bor ba la ai da ka Article 356, nga pynbna ba (a) Nga la shimti ia ki kam baroh jong ka sorkar Manipur bad ia ki bor baroh kiba la ai ne pyndonkam da u Lat bad (b) Nga pynbna ba ia ki bor jong ka ingdorbar thaw ain jong ka Manipur yn pyntreikam da lane hapoh ka bor jong ka iingdorbar Parliament.”

Ka jingeh ha ka liang ki nongialam ha Manipur ka la nangjur shuh shuh hadien ba u nongialam ka BJP uba dei khmih ia ka thain Shatei Lammihngi u Sambit Patra bad ka president ka BJP ka Jylla ka A Sharda Devi ki la iakynduh ia u Lat ka Jylla u Ajay Kumar Bhalla ha Raj Bhavan ha Imphal ha ka 12 tarik Rymphang. Kane ka jingialang kaba la neh shiteng kynta kam shym la lah ban pynbeit ia ka jingeh kaba la lam sha ka jingpynjari ia ka jingsynshar ka Sorkar Pdeng ha kane ka jylla kaba don hapdeng ka jingiakynad.

Namar ka jingnang jur ka jingiapher jingmut hapoh ka BJP ha Manipur bad ka jingthylli ha ka jingdon nongialam, ka jingsynshar President ka la treikam beit beit ia ka Manipur napoh Delhi, katba ka Parliament ka la shim ia ka bor thaw ain halor kane ka Jylla. Kane ka sienjam ka pyni ruh ia ka dak jong ka jingiaksaid jong ka BJP ban tem ia ka jingiakynad hapoh ka thain bad halor ka kynrum kynram sain hima kaba dang iaid shakhmat.