Pynjari Section 144 CrPC ban iada na ki kynhun kieng atiar, phetwir Rohingya ha khappud India Bangladesh

Syllad | The Rising MeghalayaFebruary 7, 2024

U District Magistrate, East Jaintia Hills District Khliehriat u la pynjari da ka kyndon Section 144 CrPC ha khappud ka India bad Bangladesh ha East Jaintia Hills District.

U District Magistrate ula pynjari ia kane ka hukum hadien ba ks shipai pahara BSF kila pyntip ba ki jaka kiba hap hapoh ka jingkhmih jong ka 172Bn ka dei kaba jur bha ka jingshalan tuh masi/ ki mar beaiñ, kiwei de ki tiar kum u kwai, ki kha-thad, biri, sikret, ki slasha napdeng kiwei de bad kine ki mar ki dei kiba mih na India bad leit pynpoi tuh sha Bangladesh bad ka long kumjuh ruh na Bangladesh sha India.

Ki BSF kila aijingtip ruh ba ka jingshalan tuh ia kine ki mar bad kiwei de ki kam ba long pyrshah ïa ka ri ki dei kiba jur bha ha kine ki jaka khappud khamtam ha ka por mynmiet mynïong.

Ym tang katta la pyntip ba ki don ki katto katne ki dkhot ka kynhun pyntriem bad ki phetwir Rohingya ki dei kiba ju pyrshang ban rungtuh sha u pud u sam ka ri India ha ka por mynmiet bad kane ka lah ban ktah halor ka jingshong shngaiñ ka jylla.

Ka jingjia jong ka jingshah pynïap ba dang shen ha Umkiang ba la suba donkti da ki nong Bangladesh kiba la wan rungtuh sha ki jaka khappud ka ri India ka dei ruh kawei na ki daw ba la pynjari ïa ka kyndon Section 144 CrPC.

Kane ka kyndon pyrkhing ka dei kaba la khang pyrshah halor ka jingrung jingmih ha kine ki jaka khappud jong kine ki artylli ki ri.

Ka hukum u District Magistrate ka khang pyrshah ban ïaid kjat ne pyndonkam iaka kali, kali kit mar hapoh 5 km na jingjngai na kine ki jaka khappud naduh ka por 6 baje janmiet haduh ka por 5 baje mynstep.