Pynjari u DM East Khasi Hills da ka kyndon 144 CrPC ban aijingiada ia ka wah Umiew

Syllad | The Rising MeghalayaMay 17, 2024

U District Magistrate, East Khasi Hills District u la pynmih ia ka jingmana hapoh ki kyndon Section 144 CrPC kaba khang pyrshang ban sait kali ne ban pyndonkam ia ki wahduid ne ki pung bad ban bret jakhlia nalor kiwei pat ha ki jaka lang um bad baroh ki shnat jong ka wah Umiew.

La pynjari da kane ka hukum hadien ba ka la don ka jingujor sha u District Magistrate, East Khasi Hills kaba kyrpad na ka bynta ban shim mardor ia ki sienjam ban khanglad ia kiba kum kine ki jingleh jingkam kiba pynjakhlia ia ka wah khamtam ka jingjur ka jingdon jong kiba wan sait kali hapoh ka wah Umiew ha Umiew Maw-U-Sam kaba don ha ki bynta jong ka shnong Smit, EKH, bad ia kane ka jingmaham halor kane ka bynta la pynmih ruh da ka Tnat Meghalaya State Pollution Control Board.

Nalor kata la pynpaw ruh ba kine ki jingleh kiba pynjakhlia ia ka wah, ki wahduid lada ailad ba kin iai bteng kin pynthut ruh ia ka jingtuid jong ka um bad ktah jur ia ki jingthaw ba im kiba don hapoh kane ka wah kumjuh ia ka mei mariang, bad ka ban pynlong ruh ia ki briew ba kin ym lah ban pyndonkam ia ka um na ka bynta ban dih bad buh jingma ia ka koit ka khiah na ka bynta kito kiba pyndonkam ia ka.

Kane ka jingpynmih hukum ka la treikam mardor ha baroh kitei ki jaka ba la kdew tad haduh ban da pynbna da kumwei pat.