Pynjem khnap ka Mawlai SC ia ka Nongthymmai da kaba pynliem 6-1 ha ka lympung SPL

Syllad | The Rising MeghalayaMarch 2, 2025

Ka Mawlai SC ka la don ha ka lynti ban ioh rah syndon ia ka nam lahduh ha ka lympung OC Blue Shillong Premier League 2024 hadien ba ka la lah ban pynjem khnap ia ka Nongthymmai da kaba pynliem 6-1 ha ka jingialehkai kaba la long ha ka 1 tarik Lber ha madan SSA Stadium First Ground, Polo.

Ha kane ka jingialehkai ka Nongthymmai ka la ioh ban thep ia ka kol kaba nyngkong tang ha ka minit kaba 12′ lyngba u Pynshailang Kharduid, hynrei ka Mawlai kaba la banbor ha ka jingialehkai ka la ioh ban pynphai ha ka minit kaba 27′ lyngba u Donlad Diengdoh, bad ka la ioh ban thep biang sa shi kol ha ka minit kaba 34′ lyngba u Robertson Khongriah.

Haba wanphai sha ka kylla miet ka Mawlai ka la nangioh bor shuh shuh ha kaba ka la ioh ban thep biang ia ka kol kaba lai lyngba u Banskhemlang Mawlong ha ka minit kaba 51′, bad hadien lyngba u Baiaikara Swer ha ka minit kaba 76′ bad lyngba u Romarius Laban ha ka minit kaba 86′ bad 87′.

Lyngba kane ka jingjop ka Mawlai mynta ka la ioh khur 44-point bad tam da 5 point ia ka Shillong Lajong FC kaba don mynta ha ka kyrdan kaba ar, ha kaba baroh ar kynhun ki dang hap ban iakhun sa mar ar sien bad kawei ka dei hapdeng jong ki.

Ka Mawlai kan iakhun pyrshah ia ka Laitkor SC ha ka 4 tarik Lber bad lada kan ioh ia ka jingjop ha kane ka jingiakhun ka mut ba ka la pynthikna ban ioh rah ia ka nam lahduh ha kane ka lympung OC Blue SPL ha ka sien kaba lai kynthih bad ban thaw syndon ia ka histori.

Ha kawei pat ka liang ka Nongthymmai kaba la mad ia ka jingshah rem ka la neh ha ka kyrdan kaba 9. Wat shwa ka jingiakhun ha kane ka sngi ruh ki la sngewthuh ba ka jingiakhun ka long kaba shitom, kata wata ki la lah ban pynher syrngiew shiphang ia ka Mawlai hadien ka jingioh thep nyngkong ia ka shi kol lyngba u Pynshailang.

Ka jingialehkai ha ka 3 tarik Lber kan long hapdeng ka Nangkiew Irat SC pyrshah ia ka Ryntih ha ka por 3 baje nohphai sngi. Ka Nangkiew Irat ka la jop da 1-0 ia ka Ryntih ha ka jingialehkai kaba la long ha u bnai Nohprah ba la dep.