Pynjlan ka North East United FC ia ka jingiasoi kontrak bad u Redeem Tlang

Syllad | The Rising MeghalayaFebruary 8, 2025

Ka NorthEast United FC da ka jingkmen ka la pynbna ba kala pynjlan biang ia ka jingiasoi kontrak bad u rangialehkai ba tbit u Redeem Tlang haduh u snem 2027.

Ka jingiaid lynti jong u Redeem bad ka NorthEast United FC ka la sdang naduh kaba sdang jng ka lympung Indian Super League (ISL) ha u 2014, kata hadien ba u la ialehkai na ka kynhun Shillong Lajong. Hadien ba u la mihkhmat ia ka Shillong Lajong, FC Goa bad ka Odisha FC u la wanphai biang sha ka NorthEast United FC ha u Naitung 2023.

U Redeem u dei u rangialehkai ba kongsan bha hapoh ka kynhun ba la khmih da u Juan Pedro Benali kum u coach, ha kaba u la mih ialehkai haduh 17 sien ha ka samoi ialehkai jong u snem 2023-24. Ha kane ka samoi kaba mynta u la shim ia ka bynta kaba thymmai kum u right-back bad ban mih madan naduh kaba sdang jong ka jingialehkai.

“Nga da sngewkmen shibun ban ioh ia ka lad ban bteng ban don ha ka NorthEast United FC. Nga ngeit skhem ha ka rukom pyniaid jong ka Club bad ia ka jingkyrshan na ka kynhun kaba aijinghikai bad na ki bor pyniaid. Nga ngeit skhem ba ngin lah ban ioh ia kiei kiei kiba khraw lyngba ka jingiatreilang, bad nga kular skhem ban ai ia kaba bha tam ban iarap ia ka kynhun ba kan kynjoh sha ka thong ka jong ka,” ong u Redeem Tlang.

Katba u Head Coach, u Juan Pedro Benali u la pyrto ia ka jingialam jong u Redeem hapoh madan bad shabar kumjuh da kaba ong, “U Redeem u long uba kongsan bha na ka bynta jong ngi, bad ngi da sngewkmen ba un iai neh bad ka longiing jong ka NorthEast United FC bad ngi kyrmen ba un shongthait bad pynkut ia ka kam ialehkai jong u hangne hi.”

“U Redeem u dei uba lah ban ialehkai ha buntylli ki rukom hapoh madan, bad u long uba kynsai na ka bynta ka kynhun jong ngi. Nalor kata ka jingbteng ban tei ia ka kynhun ka dei ka jingiohi jngai ka jong ngi bad u Redeem u long uba iahap bad uba biang tam. Ka long kaei kaei kaba donkam ia ngi ban pynjlan ia ka kontrak bad u,” ong u Mandar Tamhane, CEO ka NorthEast United FC.

“Na ka bynta jong ngi, ban ialehkai ha ka sien kaba nyngkong ia ka ISL ha Shillong, u Redeem uba dei u trai shnong u la ai ia ngi ia ka kabu kaba biang tam ban pynbna ia kane ka jingpynjlan kontrak ka jong u hakhmat kiba haiing hasem jong u,” bynrap u Tamhane.

Ka NEUFC ka la thaw ia ka por kaba kyrpang ban pynbna ia kane ka jingpynjlan kontrak bad u Redeem, ha kaba ha ka jingiakhun jong ka Club pyrshah ia ka Mumbai City FC, ha ka minit kaba 22 (kaba dei u nombor jersey jong u Redeem), ka Club ka la pyllait ia ka jingthoh lyngba ka placard kaba ong, “Redeem Stays 2027,” ia kaba la rah da kiba haiing ki jong u.

“Kane ka dei ka khyllipmat kaba kmen ia ka longiing jong ngi” ong ka Emmon Tlang kaba dei ka kmie jong u Redeem. “Ngi lah wan sha JN Stadium ban peit ia ki jingialehkai football mynta la bun bun snem bad mynta ban don bynta ha kane ka jngpynbna kaba long shisha kaei kaei kaba kyrpang da shisha”.