Pynjlan ka sorkar iaka rta rungkam ki nonghikai SSA haduh 45 snem ha ki skul sorkar

Syllad | The Rising MeghalayaOctober 24, 2024

Ka sorkar Jylla 23 tarik u Risaw kala shim iaka rai ban pynjlan iaka rta jong ki nonghikai SSA haduh 45 snem ban ailad iaki kin lah ban aplai bad rungkam nonghikai ha ki skul sorkar naduh lower primary haduh ki higher secondary.

Ia kane ka rai la shim ha ka jingialang ka kynhun myntri kaba la pyniaid da u myntri rangbah u Conrad K Sangma ha Resubelpara, North Garo Hills District.

Haba kren sha ki nongthoh khubor, u myntri pule puthi u Rakkam A Sangma u la ong, “Ka kynhun myntri ka la pdiang ia ka jingtyrwa ban ailad ia ki nonghikai SSA ba mynta ba kin lah ban aplai bad iashimbynta haki eksam thungkam nonghikai ha ki skul sorkar lower primary, upper primary, secondary bad higher secondary haduh ka rta 45 snem naduh mynta.”

“Kito kiba la dep shah thung kum ki nonghikai SSA katkum ki kyndon, yn shah ia ki ban iashimbynta haka  jingpynrungkam haduh ba kin da kot 45 snem,” u la bynrap.

Dangshen, ka Meghalaya SSA Schools Association (MSSASA) ka la ai por ar bnai ia ka sorkar jylla ban wanrah da ka polisi ban pynskhem iaki palat 13000 tylli ki nonghikai SSA ha ka jylla.

Na kaliang ka sorkar ruh ka la pynthikna ba kan bishar bniah ban wad iaki lad ki lynti ban pynjem iaka jingeh ki nonghikai SSA.

Mynjur ka Sorkar Jylla ia ka Ordinance ban teh kyndon ia ka jingtreikam ka Medical College shimet