Pynjop u Phrangki Buam iaka Shillong Lajong pyrshah iaka Delhi FC haka I-League

Syllad | The Rising MeghalayaNovember 23, 2023

Ka Shillong Lajong FC ka la bteng ban khur ia ka jingjop kaba ar sien kynthih hadien ba ka la lah ban pynrem noh sa ia ka Delhi FC da 2-1 ha ka jingialehkai kaba la long haka sngi Balang ha Madan SSA Stadium, Shillong.

Ha kane ka jingialehkai ka Lajong ka la lah ban banbor pyrshah ia ka Delhi FC naduh kaba sdang jong ka jingialehkai, bad dei ha ka minit kaba 24′ hadien ba ka la ioh lad ban pynkhih jar nyngkong lyngba u nongialehkai shakhmat jong ka u Karim Samb uba dei na Senegal, kata lyngba ka jingpashat ball kaba itynnad lyngba u Kynsaibor Lhuid.

Hadien kane ka Lajong ka la bteng ban banbor shuh shuh hynrei kam shym la lah satia ban ioh ia ka kabu kaba biang ha kaba ka jingialehkai ka la poi noh sha kaba kut jong ka kylla kaba nyngkong.

Kumjuh haba bteng ia ka jingialehkai ha ka kyllamiet (second half) ka Lajong ka dang iai bteng ban pyndonkam la ka buit ka bor, hynrei kam shym la lah satia ban pynurlong ia ka jingthmu jong ka, bad kane ka la pynlong ia ka Delhi ba kan shim kabu ia ka jinglong jingman bad ioh ban pyniakhaid lyngba u Gaurav Rawat ha ka minit kaba 60′.

Kane ka jingshah pyniakhaid ka la pynlong ia ka Lajong ba kan long phikir bad sdang ban pynkylla ia ka rukom ialehkai bad ban nang ioh bor shuh shuh tad haduh ba kan da ioh ban pynkhih jar biang ha ka minit kaba 82′ lyngba u Phrangki Buam kaba kylla long syndon ka kol jong ka jingjop.

Hadien kane ka jingop, ka Shillong Lajong kan pynkhreh ban ia aireng biang ha ka sien kaba san ha la iing ha ka 25 tarik mynta u bnai pyrshah ia ka Tiddim Road Athletic Union FC (TRAU) kaba don ha ka kyrdan 13 ha ka miej khein point.