Pynjur ka ASPF ia ka jingdawa wanrah ia ka nongbah Tlang ha Tura da ka jingialang paidbah ha Baghmara

Syllad | The Rising MeghalayaMarch 9, 2025

Ka A’chik State Peoples’ Front (ASPF) ka la pynjur ia ka jingdawa ban wanrah ia ka nongbah Tlang ne ka ‘Winter Capital’ ha Tura, West Garo Hills District da kaba pynlong ia ka jingialang paidbah kaba lai jong ka ha Baghmara, South Garo Hills ha ka 8 tarik Lber.

Kane ka jingialang kaba long shibynta jong ki jingpynsngewthuh paidbah kaba dang iaid shakhmat ka thmu ban pynioh ia ka jingkyrshan bad ban pynbor ia ka sorkar Jylla ba kan pynurlong ia kane ka jingdawa kaba la slem bha ban wanrah ia ka nongbah Tlang ha Tura.

Ha kane ka jingialang la sakhi ia ka jingwan iashim bynta jong ki nongialam na ki kynhun nongshong shnong, ki Nokma, ki nongmihkhmat na ki kynhun sengbhalang, ki riew rangbah bad kiwei kiwei kiba la pynpaw ia ka jingiatylli ban pynjur ia kane ka jingdawa kaba la slem bha.

U nongtrei kam bhalang u Greneth Sangma ha ka jingkren u la ban jur ba kane ka jingdawa ban wanrah ia ka nongbah Tlang ha Tura kam dei satia ka jingshim kabu, hynrei ka dei ka jingdawa kaba shonghok.

“Ka sorkar Meghalaya ka la leh bym salia halor kane ka jingdawa kaba shonghok mynta lah palat sanphew snem kynthih, kata wat hadien ka jingkular da ki nongseng ia ka jylla ka jong ngi.Ka la dei ka por ban leh ei ei,” u la pynbna.

Ka Secretary ka ASPF kaba dei ruh ka nongiasaid ain ka Bernita Marak ka la ai khublei ia u Myntri Rangbah ka jylla u Conrad K Sangma halor ka jingthaw ia ka committee ban bishar bniah ia kane ka jingtyrwa bad ai ruh ka jingiaroh ia u nongialam ka liang pyrshah u Mukul Sangma uba la wanrah ia ka resolution ka ban sah jingkynmaw ha ka iingdorbar kaba kyrshan ia kane ka sienjam.

“Kane ka dei ka por kaba biang na ka bynta ki paid Garo. Ngi dei ban iatylli lang bad iengskhem tad haduh ba kane ka jingangnud kan wan urlong shisha,” ong ka Marak.

U Acting Chairman ka Garoland State Movement Committee (GSMC), u Balkarin Ch Marak u la ai khublei ia baroh ki nongwan iashim bynta namar ka jingkut jingmut kaba skhem jong ki bad pynthikna ruh ba kane ka jingdawa ban wanrah ia ka nongbah Tlang ha Tura ka dei kaba don ia ka tynrai ha ka histori jong ka thain.

“Ki kpa tymmen jong ngi ki la pyrkhat bad iohi ia kane, bad ngi dei ban iohi lyngba. Ka jingialeh kam kut tang hangne, ka sur ka jong ngi lang baroh ka dei ban nangkhlain haduh ba ka sorkar kan leh ei ei halor kane ka jingdawa,” u la iai ban