Pynjynsur ka sorkar Meghalaya iaki adong adit COVID-19, ym don kam RTPCR ia kiba rung sha Jylla, ki skul ki plie noh

Syllad | The Rising MeghalayaFebruary 9, 2022

Ka Sorkar Meghalaya haka sngi Balang kala pynbna ba kala pynjynsur iaki adong adit ka jingpang khlam COVID-19 ha kaba ki skul kin plie naduh Rymphang 14 tarik bad kiba la dep ai tika ar wat kim don kam shuh ban phah test RTPCR haba rung shapoh Jylla.

Ia kane ka rai ka sorkar kala shim haka jingialang ki myntri sorkar halor ka jingpang khlam COVID_19 ha Jylla.

Ka Jylla haduh mynta ka sngi ka don haduh 1098 ngut ki briew kba dang shitom bad ki don ar ngut kiba khlad na East Jaintia Hills bad East Khasi Hills District.

Kiba iabit thymmai ki don 125 ngut bad kiba ioh pat iaka koit ka khiah ki don 233 ngut. Baroh kiba iabit khlam hapoh Jylla ki don 92646 bad kiba ioh pat iaka jingkoit jingkhiah baroh 89994 ngut bad ka jingdon ki briew ba iap baroh kalong 1554 ngut ha Jylla.

U Myntri Rangbah Conrad K Sangma haba kren bad ki nongthoh khubor hadien ka jingialang ula ong ba ki skul ha Shillong kin plie naduh ka sngi Nyngkong.

Ula iathuh ruh ba ka sorkar kala rai ban weng iaka jingpyrkhing halor ban test RTPCR kiba la dep ai tika ar sien bad iaki night curfew ne korphiw miet naduh Rymphang 11.

Shuh shuh ula ong ba ym donkam shuh ban pan jingbit lada dei ban leit ban ontep ne onthang ia ki briew kiba la khlad, tangba hap ban bud ryngkhi ia ki kyndon iada Covid, bad pyrkhing ruh ia ka jingiawan buin ngut jong ki briew.

Yn nym don shuh ka jingpyrklhing ia ki jingialang, iathoh ne shongkurim, tangba, donkam ban da pan jingbit na la ki Depurty Commissioner ne ki SDO (Civil) bad ka jinglah ban ia lum ki briew kan shong ruh kat kum ka rai ka jong ki.

Katba ka kyndon iaid kali odd bad event kan dang iai bteng ha nongbah Shillong.