Pynkhein kyndon ki nongdie dukan ujor ka JSU sha u DC

Syllad | The Rising MeghalayaJuly 22, 2020

Ka Jaiñtia Student Union (JSU) Central Body mynta ka sngi hapoh ka jingialam u general secretary JSU u Jersom Shylla kala leit ai da ka dorkhas ban ujor ha u Deputy Commissioner ka West Jaintia Hills District, Garod LSN Dykes halor ka jingpynkhein kyndon ki nongdie dukan bad ka jingym bud ryntih iaki lad jingiada na ka khlam COVID-19 katkum ka jingbthah ka tnad ka koit ka khiah.

Ka JSU haka dorkhat kaba kala ai sha u DC kala pynpaw ba bun ki dukan ba kynthup iaki dukan khutia bad ki dukan die lang ki leh bym suidniew ban bud iaki kyndon bala bthah da ka tnad ka Koit ka Khiah bad ka sorkar ban buh iaki register ban thoh kyrteng jong ki briew, ki jaka sait kti bad ki sanitizer.

Ka JSU kala kynnoh ruh ba ki trai dukan ruh ki kiar ban pyndonkam iaki mask haba die jingdie haba don nongthied nongpet ha ki dukan jong ki kaba pynkhein iaki kyndon bala bthah ka tnad koit ka khiah, kaba dei kawei na ki lad ban iada na ka khlam COVID-19.

Ka JSU kala ong ba u DC ula pynmih ka hukum ba dukan ki dei ban buh register ban thoh iaka kyrteng ki briew, hynrei ki dukan ki leh bymsuidniew ban bud ia kane ka jingbthah.

Ha ka jingiadei bad kane ka seng ka la kyntu ruh ia baroh ki paidbah ban iatreilang ha kum kane ka por ba kane ka jingpang ne ka khlam Covid-19 kaba la pur wat ha kane ka district kala kyrpad ia baroh ki dukan ban buh ia ka register ne ka copy na ka bynta ban thoh ia ka kyrteng, phone number bad jaka sah jong ki briew ba wan ha ki dukan jong ki, khang ba lada jia ba don mano mano ba ioh ia ka jingpang Covid-19, kan pynsuk ia ka tnat treikam jong ka koit ka khiah ne ka Health Department ban buddien. Ka JSU kala ong ba donkam ban pynkylla iaka jinglong jongman jong u briew nalade shimet ban bud iaki jingbthah bad jinghikai ban iada na kane ka jingpang khlam.

Ka JSU kala kyntu ia DC ban pynbiang iaki jaka sah jong ki nongniah kali 108 namar ba ki long ki briew kiba hakhmat eh ban iarap ne kit ia ki nongpang COVID-19. U DC u la ong ba iaki jaka sah jong ki ka sorkar kala dep pynkhreh. kane kalong katkum u kyrwoh na u Publicity Secretary ka seng u Tricky Mukhim.