Pynkhie im biang iaka jingialehkai Karate ha Jowai, sdang ka jingkilan ki khynnah

Syllad | The Rising MeghalayaOctober 13, 2024

Ka Karate ka dei kawei na ki jingialehkai kaba paw bha ha ki snem 80 bad 90 ha kaba ki bun ki samla samhoi ka rilum Jaintia ki ialehkai ha kane ka jingialehkai, hynrei kane ka jingialehkai namar ka jingbym don ki jaka ialehkai ba paka kala pynnnoh mynsiem ia kiba bun bad don katto katne ngut kiba dang bteng iaka jingialehkai hala ki jong ki jong ki jaka ba ki don.

Ka dei ka jingialehkai kaba iarap ban ioh iaka bor met kaba smat ba sting bad ban iada ruh ialade ne ka self-defense bad iarap ruh iaki khynnah ban nang iaka burom ka akor bad pynleit jingmut ha ki kam ki jam.

“Ka jingbym don ki jaka ialehkai kiba paka kala pynlong ruh iaki synjuk ban noh mynsiem bad ban sangeh ban pynlong iaki jinghikai ha ki phew phew snem,” la ong u ma Alan Niangti, 2nd Dan Shotokan Blackbelt bad u president jong ka West Jaintia Hills Karate Do Association (WJHKA) haba kren bad u nongthoh khubor haba pynkut iaka Special Training Camp kaba shi taiew lynter ha iungwalieh ka shnong Loompyrdi Iongpiah haka 12 tarik Risaw.

U Ma Alan ula iathuh ba dang shen ha bnai Naitung hadien ba kila ioh iaka jaka ialehkai na ka Loompyrdi Iongpiah kila sdang pynkhih mynsiem iaki para nongialehkai ialehkai bad sdang iaka jingkilan iaki khynnah bad iaki samla.

Kane ka jinghikai kala sdang naduh 7 tarik bad la pynkut iaka 12 tarik bad la shimbynta da ki phew ngut ki khynnah bad samla ialehkai.

U Ma Alan ula iathuh ruh ba ka jingpynkhie im ia kane ka jingialehkai karate ka dei ruh na ka bynta ban pynkhreh iaka Meghalaya Games 2025.

Ha kane ka sngi pynkut ia ka jinghikai la iadonlang u ma Khroobok Passah, District Sports Officer (DSO), West Jaintia Hills kum u kongsan, u Ma E. Manbha Kynjin, 1st Dan Blackbelt kum u General Secretary WJHKA, u Ma Wyraiki Kharbukhi kum u Vice-President, u Yatha Chyrmang kum u Asst. General Secretary (1st Dan Blackbelt), u Pynioochwa Phira kum u Treasurer (1st Dan Blackbelt), u N. Kiwi War Passah 2nd Dan Black Belt (Instructor), u Mingson Rymbai 3rd Dan Black Belt (Instructor), u Polestar Niangti 1st Dan Black Belt (Auditor), u Patcha Chyrmang Auditor Assistant Instructor bad u Ribait O. Pde kum u Auditor (1st Dan Blackbelt).

La iadonlang Bah Donboklang Lyngdoh, 5th Dan Blackbelt u dkhot ka All Meghalaya Karate Do Association (AMKA) bad kiwei kiwei.

Ki jait jinghikai ba hikai iaki khynnah, ki long kiba iaid katkum ki dustur bad ka rukom ai jinghikai karate, kynthup ia ki jingeh, Punching, Kicking, Blocking, Self-Defense nalor kiwei ki jait jinghikai kiba iahap bad ka jingiaid lynti jong kane ka jait ialehkai.

U Ma Khroobok Passah, DSO, West Jaintia Hills, u pynpaw ka jingkmen halor ka jingpynkhie im ia kane ka jait jingialehkai hapoh ka District kaba dei ka jait jingialehkai kaba ki khynnah ki hap ruh ban trei shitom dalade bad u kyrmen ba lyngba ka jingstad bad jingkitkhlieh jong ki bor pyniaid jong ka WJHKA, ka District kan ioh ban rah nam bad burom ha ka Meghalaya Games 2025.

U DSO jong ka West Jaintia Hills, ula kular ban ai ka jingiatreilang bad kane ka WJHKA ha kano kano ka por khnang ban kyntiew ia kane ka jait ialehkai na kawei ka por sha kawei pat.

La pynkut iaka jingialang da ki kyntien khublei na u Ma Ribait-O Pde, Auditor WJHKA.