Pynkhie im iaka COMSO, buh thong halor ka ILP, MRSSA, bhah thungkam bad u pud u sam

Syllad | The Rising MeghalayaApril 14, 2025

Ki kynhun Sengbhalang ka Rilum Khasi Jaintia bad Garo ha ka 12 tarik Iaiong ki la pynkhie im biang ia Confederation of Meghalaya Social Organisations (COMSO) ha ka jingialang kaba la long ha Tura.

U Bah Roykupar Synrem, President ka Hynniewtrep Youth Council (HYC) u la shah jied kum u Chairman, katba u Sambormi Lyngdoh President ka Jaiñtia National Council (JNC), bad u  Roger D. Shira, President ka A’chik Progressive Approach (APA), ki la shah jied kum ki Vice-Chairmen.

U Balkarin Ch. Marak, Acting Chairman ka Garoland State Movement Committee (GSMC), u la shah jied kum u General Secretary, bad u Bah Bandari Ryntathiang, President ka Confederation of Ri-Bhoi People (CORP) kum Additional General Secretary.

Ha katei ka jingialang la thung ruh ia ki Organising Secretary na baroh ki laitylli ki thain, kata kiba kynthup ia u Jacius Sangma na ka bynta ka Rilum Garo, u Rhembor G. Saibon na ka bynta ka Rilum Khasi bad u  Nangshwa Sutnga na ka bynta ka Rilum Jaintia. Ia ka kam Publicity Secretary la pynkhamti sha u Bah Jubanjoy Swer bad Tony Marak na ka bynta ka Rilum Khasi & Jaiñtia bad Rilum Garo, bad la thung ia u Momin uba dei u nongtrei mong sngewbha kum ua Adviser ka COMSO.

Haba kren ha ka jingialang, u Bah Roy Kupar u la ban jur halor ka jingkongsan halor ka jingwanrah lang ia kajuh ka thong na ka bynta ki paid riewlum trai muluk ka Jylla. U pynkynmaw ruh ia kito kiba la ia don lang ha ka jingiamir jingmut kaba la dep ha Shillong ha kaba la ia mynjur lang ban thaw ia kawei ka rynsan ka ban shimkhia ha kaba iadei bad ki mat bad ki jingeh kiba iadei lang.

Ka bynta kaba kongsan eh napdeng kine ki jingeh ka kynthup halor ka jingdawa ban pyntreikam ia ka Inner Line Permit (ILP), ka jingpynkylla ia ka Meghalaya Residents Safety and Security Act (MRSSA), bad ka jingai bhah kaba 44% ia ki trai muluk ha ki kam ki jam jong ki Tnad ka Sorkar Pdeng. 

“Namar kata ka jingpynkhieim biang ia ka COMSO ka wanrah lang ia ka bor bad ka jingmut kaba iatylli lang kawei hapdeng ki jaidbynriew ka Rilum Khasi Jaintia bad Garo kaba la thaw ia ka kynhun ka ban shimkhia halor kine ki jingeh,” ong ka COMSO lyngba u kyrwoh.

Ka la ong ruh, “Ka thong ka jingpynkhieim ia ka COMSO hapoh ka jingialam jong u Bah Roy Kupar ka paw shai hadien ba u la pynpaw halor ka jingdonkam ia ki buit treikam kiba khlain ki ban pynthikna halor ki lad jingiada ia ki hok jong ki trai muluk. Kane ka rynsan kan trei shitom ban pynsngewthuh paidbah, ban pan jingkyrshan bad ban iaid da ki lynti kiba katkum ka ain bad ki lad sain pyrthei kiba donkam ban wanrah ia ka jingkylla kaba neh.”

Nalor kata ka kyrwoh ka ong, “Kawei na ki mat ba kongsan ba la iakren ha kane ka jingialang kalong halor ka jingdonkam ban shimkhia mardor ha kaba iadei bad ka jingwan kyntur pud jong ka Assam bad kumjuh ruh ka jingwan buhai shnong beain da ki briew kiba nabar jylla hapoh Meghalaya.

Kane ka mat ba la rah da u John Marak ka khot ia ka jingdonkam kyrkieh ban tuklar mardor namar ka hok halor ka khyndew ka shyiap bad ka jingiada ia u pud u sam jong ki trai muluk ki dei kiba kongsan ban pynneh pynsah ia ki trai muluk ha Meghalaya. Kane ka mat nalor ka jingiada ia ka kolshor, ka ktien ka thylliej bad ki marpoh khyndew kin long ki mat ba kongsan kiba ka COMSO kan iasaid, bynrap u kyrwoh.