Pynkhie im ka shnong Samanong ia u jingbam tynrai ba pyndap bam haba duna u khaw, ai iing bad kor tylliat ka JHDS

Syllad | The Rising MeghalayaFebruary 24, 2022

Ban pynkhie im biang ia u jingbam uba pyndap bam haba duna u kba u khaw ha ki thiar bad ban pynshlur iaka rukom rep u mynbarim, ka Jaintia Hills Development Society (JHDS) kala ai sngewbha da ka ïing bad ka kor tylliat Krai (millet) sha ki nongshong shnong ka Samanong.

Kane ka shnong ka jngai tang kumba 15 KM na Jowai, ka district headquarter jong ka West Jaintia Hills bad ka hap hapoh ka Amlarem Sub Division.

Ka Jaintia Hills Development Society hadien ba kala lap ba ki dang don ki longïing ha kane ka shnong ka dang pynneh iaka rukom rep u barim, kata ban rep ia u Krai naka bynta ban ai bam sniang, kala shim iaka sienjam ban shna iaka ïing bad ai da ka kor tylliat ban pynbun iaka jingpynmih ia une u mar bam, uba pyndap iaka bam ka dih iaki riew hyndai haba jia ba wan lyngshop ka bor mariang bad ka jingbam khniang ki jngthung jingtep ha ki jaka rep.

Ia kane ka ïing bad ka kor tylliat ne kaba tip kum ka Millets Processing Unit, ka JHDS kala synniang sha kawei ka Self Help Group (SHGs) kaba la tip kum ka Shisur SHG haka 23 tarik Rymphang 2022.

La plie paidbah ia kane ka iing da u President ka Khublei Germany u Garhard Albert ha ryngkat ka jingiadonlang u Director ka JHDS u Rev. Fr Manbha Pakem bad ki nongtrei ka JHDS.

Ka JHDS kala ong ba kane ka shnong ka dei kawei napdeng ki katto katne ki shnong kaba dang pynneh pynsah ia ka rukom rep ia u Krai ha rilum Jaintia uba long u wei na ki jingthung ba bha tam u ba la sdang ban duh jait.

Ka Jaintia Hills Development Society ha u snem 2019 kala lap ba don tang 3 tylli ki ïing haka shnong Samanong kiba dang rep ia u Krai ban ai bam sniang. Kumta khnang ban pynkhe im biang ia une u symbai barim, ka JHDS ka la trei borbah ban pynshlur ia ki nongrep lyngba ki jingai jinghikai bapher bapher khamtam eh la hikai ia ki nongrep ban pyndonkam ia une u jingthung ban shet jingbam kynthup iaki cake bad kiwei kiwei ki jingbam ban dih sha.

Da ka jingai jinghikai ka JHDS mynta kane ka shnong kala don haduh 20 tylli ki longïing kiba la rep ia une u jingbam.

U Phadar Manbha bad u Garhard Albert kila ai mynsiem bad pynshlur ia ki nongrep ban treishitom ban iaid shakhmat ha ka ban pynbun shuh shuh ia ka jing pynmih ia une u jingthung.

U Fr. Manbha Pakem u la kular ruh ba ka JHDS kan iaibteng ban kyrshan ia ki khamtam eh ha ka ban pyniaidiew ia kine ki jingbam ba la shna na u Krai.

La pynshongshit iaka jingplie paidbah ia kane ka processing unit da ka jingshad jingrwai tynrai ba la iashimbynta da ki kynhun ki samla bad kynthei ka shnong Samanong.