Pynkhie im u samla iaka khlaw; pyllait im ia u mrad ba la jan duhjait ha khlaw Lum Wyrtoh

Syllad | The Rising MeghalayaJune 22, 2024

Hapdeng ki jingialap ban pynneh pynsah ia ka mei mariang, uwei u samla rangbah na ka thain Nongpoh, Ri Bhoi District, u la mih shakhmat ban shim hi ia ka jingkitkhlieh da kaba ialeh ban pynkhie im pat ia kawei ka khlaw jong ka Raid Nongpoh bad ruh ban sumar bad ai jingiada ia ki jingthaw ba im kiba don hapoh jong kane ka khlaw.

Une u samla u dei u John Rymbai, na ka shnong Mawroh, Nongpoh, uba trei ban shakri ia ka imlang ka sahlang bad kiwei kiwei ki kam shakri kiba u thrang ban aiti met bad mynsiem halor kine ki kam.

Kawei pat ka kam shakri paidbah kaba u Bah John Rymbai u la rai ban ieng ialeh ka long ban shakri ia ka mei mariang kata ban pynkhie im ia kawei pat ka lum bna nam ha ka thain Nongpoh kaba la tip kum u Lum Wyrtoh ba baroh ki ju tip kum u Lum Kñia da ki nongshong shnong.

Kane  ka long ban pynkhie im ia kane ka lum kaba la ñiew kyntang da ka Raid Nongpoh bad Dorbar Shnong Nongpoh kata da kaba thung ia ki dieng bapher bapher kiba lah ban pynmyntoi ym tang ia ka mei mariang na ka jingjyrngam ka jong ka hynrei wat ia u bynriew, ki mrad ki mreng bad ki sim ki doh namar kane ka kam thung ia ki dieng bapher bapher nalor ki diengsoh, ki kait kan pynmyntoi namar ka jingpahuh ka umbam umdih bad wat ki soh ki pai ba ki mrad ki mreng bad ki sim ki doh kin ioh ia ka bam ka dih ka jong ki.

Une u samla rangbah u la iathuh ba u la shimti ia kane ka kam shakri ban shakri pat ruh ia ka mei mariang ka long ban pynkhie im ia kane ka khlaw kaba la shu ieh shrah da ki phew snem hynrei hadien ka jingiapynbeit lang bad ki bor nongpyniaid ka Dorbar Raid Nongpoh lem bad kiwei kiwei ki bor, u la ioh ban shimti kum u nongpeit nongkhmih ia kane ka lum bad ka khlaw kaba jngai tang kumba 1.5 kilometer na u surok bah kata naduh u snem 2022 terter da kaba u la sdang ban pynkhuid bad pynkhie im ia kane ka khlaw da kaba thung ruh ia ki dieng soh dieng pai, bad ki dieng bapher bapher kiban pynmyntoi ia u bynriew bad ia ki mrad ki mreng khamtam ki sim ki doh bad kane ka khlaw ruh ka dei kaba iasoh bad ka Nongkhyllem Wildlife Santuary kumta ki mrad ki mreng kin lah ruh ban ioh ia ka bam ka dih bad ban nang roi na ki soh ki pai ba la thung hapoh kane ka khlaw.

Ha kane ka jingiaid lynti jong u Bah John Rymbai, da ha ki ar sngi ba la leit noh, u la ioh ban pynlait im ruh ia u wei u mrad ba la jan duhjait ba ngi ju tip kum u mrad Bangsoh lane ha ka ktien Nongwei ba la tip kum u Slowloris bad ia u ne u mrad u Bah Rymbai um shem la aiti sha ka tnad Wildlife ban leh ia kaba donkam hynrei u la shim ka jingkitkhlieh dalade hi ban pynlait ha katei hi ka khlaw da ka jingangnud ba u ne u mrad Bangsoh un heh un san bad nang pynroi ia ka jingdon jong ki, da kaba u la bynrap ruh, ba u ne u mrad u dei uba dang rit un don beit la ki kmie ki kpa bad kumta u don jingkyrmen ba un nang ia roi na kawei ka sngi sha kawei pat.