Pynkhihwin ka kynhun tem ‘Europe’ ha ka sngi kut jong ka Tamasa Me•Gong Festival

Syllad | The Rising MeghalayaDecember 1, 2024

Ka kynhun tem ba pawnam na Sweden ka ‘Europe’ ka la pynkhihwin bad pynhun mynsiem jrut ia ki phew hajar ngut ki paidbah kiba la wan ban sakhi ha ka sngi kut jong ka tamasa Me-Gong Festival ha madan Baljek, West Garo Hills ha ka 30 tarik Naiwieng.

Kane ka kynhun tem ba pawnam bha lyngba ki jingrwai kum ka “The Final Countdown”, “Carrie” bad kiwei kiwei kala wan tem biang sha India hadien 36 snem, bad ka sien ba ka wan tem khatduh eh ka dei ha Mumbai ha u snem 1988.

Kane ka tamasa ba ar sngi kynthih ka la sdang ha ka 29 tarik Naiwieng ha kaba la sakhi ia ka jingwan iashim bynta jong ki hajar ngut ki paidbah tang ha ka sngi kaba nyngkong ha kaba ki paidbah na kylleng ka jylla bad kiwei pat ki la ioh ban sakhi ia ki kynhun nongrwai ba pawnam kum ka Gajendra Verma, ka kynhun rock band na India ka Euphoria bad ka DJ Udita Goswami.

U Myntri Rangbah ka Jylla u Conrad K Sangma, u Myntri ka Tnad Tourism u Bah Paul Lyngdoh, Myntri ka Tnad PHE u Marcuise Marak lem bad kiwei pat ki heh sorkar ki la iadon lang ha kane ka sngi pynkut ia ka tamasa.

U Myntri Rangbah ka jylla u la pdiang sngewbha da lade hi ia ka kynhun tem Europe bad kiwei pat ki kynhun kiba la wan sha Meghalaya bad Rilum Garo. U la kdew ruh ba kiba bun na ki nongshong shnong ka jylla bad ka thain Shatei Lammihngi baroh kawei ki dei kiba la heh la san ha ka ban sngap ia ki jingrwai ki jong ki, bad ba kane ka dei ka jingphohsniew kaba la wan urlong na ka bynta kiba bun balang.

U la ong ruh ba kane ka thain ka dei kaba ieid bha ia ki jingrwai rock jong ki snem 80 bad 90, bad ka Me-Gong Festival ka la khring shisha ia kiba bun bah ki riew ieid jingrwai na kylleng jong ka ri.

“Nga da sngewkmen shibun ban ioh ia kane ka lad ban iashim bynta ha kane ka Me-Gong Festival ha Rilum Garo, ka long kaba sngewphylla ba ki jingtem jingrwai jong ngi ki la poi wat shaduh kine ki jaka kiba kyndong jong ka pyrthei,” ong u Joey Tempest u nongrwai ka kynhun tem Europe.

“Nga kynmaw ia ki riew ieid jingrwai jong ngi ha u snem 1988 bad ngi sngewkmen shibun ban iohi ia kajuh ka jingieid jingsngewtynand hangne.Kane ka jingwan ka jong ngi sha Rilum Garo khlem pep kan nangai mynsiem ban thaw ia ki jingrwai jong ngi.”

Ha kajuh ka por u Tempest u la pyrto ruh ia ka jinglong jingman jong ki sawdong sawkun ka Rilum Garo, bad u la ong ruh, “Kane ka kynhun ka dang dei kawei na kiba tbit tam ha kane ka pyrthei bad ka jingktah ka jong ka ka dang khraw shibun,” u la ong, “Ka puta ka tem kan ym iap! Ki jingrwai Rock kan iai im.”

Kawei pat ka kynhun tem ba pawkhmat na India ka Indus Creed ruh ka la iashim bynta ha kane ka rynsan nalor ka kynhun Restless Desire, Shanka Tribe bad kiwei kiwei.