Pynkhlain ki BSF ia ka jingpahara ha khappud ba nangjur ka jingiaumsnam ha Bangladesh

Syllad | The Rising MeghalayaJuly 22, 2024

Namar ka jingnang jur ka jingiaumsnam hapoh ka ri Bangladesh, na ka liang ki shipai Border Security Force (BSF) Meghalaya Frontier kiba khmih ia ki jaka khappud kaba 444 km hapdeng ka India-Bangladesh ki la pynkhlain ia ka jingpahara lyngba ka “Ops alert” ban pynthikna ban tehlakam ia ka jinglong jingman ha ki thain khappud.

Na ka liang u Inspector General (IG) of BSF Meghalaya u Harbax Singh Dhillon u la pynpaw ba kawei ka jingsngewkhia kaba kongsan tam ha kane ka khyllipmat kaba mynta ka dei halor ka jingioh wanphai suk jong ki samla pule nong India kiba pule hapoh Bangladesh.

U la ong ruh ba naduh ka 18 tarik mynta u bnai ki shipai BSF ka Meghalaya ki la pdiang sngewbha ia ka jingwan rung jong ki 574 ngut ki samla pule nong India, ha kaba haduh 435 ngut ki dei ki samla pule na Nepal, bad 8 ngut na Bhutan lyngba ka Dawki Integrated Check Post (ICP) ha East Khasi Hills district. Nalor kata ki don sa 18 ngut ki samla pule kiba la wanphai haka sngi Nyngkong lyngba ka ICP Kilapara ha ka thain West Garo Hills district, Meghalaya.

Nalor kata u IG BSF Meghalaya u la hukum ruh ia ki heh shipai kane ka tnad ba kin khmih na ka bynta ban iarap ia ki nong India khamtam ia ki samla pule ba kin rung lyngba ka ICP Dawkai bad ICP Kilapara da kaba pynioh ia baroh ki lad jingiarap kynthup naduh ka umbam umdih, ka bam bad ki lad jingsumar nalor ka jingpynkhreh ia ki kali na ka bynta ba kin leit sha ki jaka kiba ki dei ban leit. U la ong ruh ba ki la khmih lynti ba kin dang don shuh shuh ki samla pule ki ban dang wan jam lyngba kane ka jaka namar kane ka jinglong jingman hapoh ka ri Bangladesh.

Da kaba pynthikna halor baroh ki lad jingiarap na ki BSF sha baroh ki nongshong shnong jong ki ri bapher bapher khamtam ia ki nong India kiba wan rung sha u pud u samla jong ka ri lyngba ka lynti kaba dei, hynrei u la ong ruh ba ki bor shipai ki la pynkhlain ruh ia ka jingpahara ha kine ki jaka khappud ban pynthikna ba kan ym don satia kano kano ka jingwan rung beain sha u pud u sam jong ka ri India.