Pynkhlain pahara ka Sorkar ha Shillong hadien ki jingjia kawang petrol bom
Na ka liang ka sorkar Jylla ka la pynkhlain ia ka jingpahara ha ka nongbah Shillong kumjuh ha kiwei pat ki district headquarter hadien ki jingjia shah kawang petrol bom ba khah khah pyrshah ia ki jingdon jingem jong ka sorkar kynthup ia ki police station.
Haba kren sha ki lad pathai khubor u Deputy Commissioner ka East Khasi Hills District u SC Sadhu u la ong, “Ia kane ka bynta ngi la iakren ha ka miet sngi ba Ar bad u Superintendent of Police ka East Khasi Hills. Ha ka jingshisha ngi la pynkhlain ia ka jingpahara khamtam ha ka por mynmiet.”
![](https://www.syllad.com/wp-content/uploads/2024/09/JIT-Vacancy-823x1024.avif)
U la pyntip ruh ba na ka liang u SP u la pynkhreh bha ia ka plan na ka bynta ban tehlakam ia ka jinglong jingman bad ia ka shongsuk shongshngain ha ka nongbah Shillong.
Nalor kata u la ong ruh, “Ngi la iakren halor kiei kisienjam kiba donkam ban shim bad ruh na ka bynta ban ithuh ia ki briew kiba donkti ha kine ki kam thombor bad ba ngin sa nangshong pyrkhat biang.”
Shuh shuh u DC u pyntip ruh ba ki la aijingtip sha baroh ki ophis ki tnat sorkar ban buh ia ki kali bad kiwei pat ki jingdon ki jong ki ha ki jaka kiba shngain bad ban ym buh thurmut ha ki jaka ba laitlan khamtam ia ki kali sorkar.
“Ngi la pynkhlain ia ka jingpahara bad ngi kyrmen ba ha kine ki shi sngi ar sngi ngin lah ban tehlakam ia ka jinglong jingman baroh khamtam ban pynneh ia ka shongsuk shongsain,”bynrap u DC.
Leave a Reply