Pynkhreh ban sdang noh ia ka State University: Rakkam

Syllad | The Rising MeghalayaFebruary 22, 2024

U Myntri ka tnad pule puthi u Rakkam A Sangma haka 21 tarik u Rymphang u la pyntip ba ka sorkar jylla ka la sdang ban pynkhreh ki jingdonkam ban pyntyllun noh ki kam ha skulbah Captain Williamson Sangma State University.

Ha ka jingai jubab hakhmat ka ïing ka dorbar thaw aiñ, u Sangma u la ong ka sorkar kala mang ban thung sa 100 tylli ki post ha Tura bad 6 tylli ha Shillong Campus.

Ka jinglut halor kane ka kot sha ka T45.7 klur manla u snem.

U la pyntip ruh ba ka kam ban thung ïa u vice chancellor ha katei ka skulbah kala poi arted sha ka sienjam bakhatduh. Ula ong ruh Sangma ba ka sorkar ka buhthong ban pyntreikam noh ïa kane ka skulbah mynta u snem 2024.

Hynrei ka jingwan noh ka elekshon MP, lada ym lah ban thung kam ia baroh ki post, kane ka skul bah kan hap ban sdang treikam ha une u snem ban wan u 2025.

Shuh shuh une u Myntri u la pyntip ba ka pisa kaba la lut ha ka jingshna ïa katei ka skulbah kala kot sha ka T. 16.96 klur. La pyndep ruh iaki jingtei iaka jaka treikam (administrative block), ki kamra Klass (academic block) bad ka hostel na ka bynta ki khynnah kynthei bad shynrang

Haduh kat mynta 58 tylli ki post la mang ban thung kynthup vice chancellor bad registrar. U la pyntip bala dep mang ban shna iaka internal road bad ban pynpoi iaka um.

“La dep ban thung ruh ïa ka  Board of Governors. Ka jingïalang ba nyngkong jong ka Board of Governor ka la long ha ka 14 tarik u Kyllalyngkot 2022 ba la pynïaid da u Myntri ka tnad pule puthi,” la bynrap u Myntri.