Pynkhreh jaka shong ka sorkar ia ki nongdie madan ban pynkylluid ia ka Khyndailad

Syllad | The Rising MeghalayaMay 1, 2024

U Myntri ka Tnat Tourism u Bah Paul Lyngdoh haka 30 tarik Iaiong, u la pyntip ba ka jingpynkhreh ban pynkynriah noh ia kumba 200 ngut ki nongshong dukan madan ha ki bynta jong ka Khyndailad sha ka jaka ba la pynkhreh yn lah ban pyndep noh ha kaba kut  jong u bnai Jylliew u ban wan.

Haba kren sha ki lad pathai khubor ha ka jingleit iashim bynta ha ka iew Sohshan ne ‘Strawberry Market’ ha Khyndailad une u Myntri u la ong, “Ngi la shim ia ka rai ban pynbna ia ka khyndai lad kum ka jaka iaid paidbah, ha kaba yn ym don ki kali ki ban ioh rung shapoh ka jaka iew.

U la ong uh ba na ka liang ka Shillong Municipal Board ka la dep don lypa hapdeng jong ka kam bad ki khmih lynti ba kin lah ban pynurlong noh ia kane ka jingthmu ban pynkynriah ia ki nongshong dukan madan kumba la buh por.

“Hadien ba la lah ban pynurlong ia kane, ka Khyndailad kan kylla long ruh ka jaka ka ban khring ha ka liang ka put ka tem ne music hub bad ka ban khring ruh ia ki nongwan shangkai pyrthei sha kane ka nongbah Shillong,” ong u Bah Paul.

Nalor kata u la ong ba kin thaw ruh ia ka rynsan ka ban neh ha katei ka jaka khnang ban plielad ia ki nongtem nongput bad ki nongrwai bapher bapher ki ban pynmyllen ia ki nongwan shangkai, kata kynthup ruh ia ki riew donsap kiba dei ki trai shnong.

Haba kylli une u Myntri u la pyntip ruh da kaba ong, “Ngi la lah ban pyndep lut ia baroh ki sienjam bad kaba sah mynta ka long ban pynkynriah ia kine ki nongshong dukan madan ha ki bynta jong ka Khyndailad, hynrei kham pajih na ki lynti surok bad ki lynti iaid kjat.”

“Ngi la dep ban ithuh ia ka jaka shong na ka bynta kine ki nongshon dukan madan ha ryngkat ka SMB.Kumta ruh na ka liang ka MUDA ka la wan shakhmat ban ai ka jingkyrshan bad ngi khmih lynti ba ha kine ki jaka ia die iathied ba la ithuh hapoh jong ka MUDA Complex ha Khyndailad yn lah ban pyngshong ia kine ki nongshong madan.”

Shuh shuh u la ong ruh, “Ngim lah ban khmih lynti ban ioh ia ka jingkyrshan kaba pura na baroh, hynrei ngin hap ruh ban  kynmaw halor ka jingjia pluh ding kaba triem hajan kane ka jaka ha kaba kawei ka iing ka la shah pynjulor ha ka ding kaba klang ha kaba ki kali pynlip ding kim shym la iohlad laitluid ban poi ha ka por kaba biang namar ka jingwit jong ki nongshong madan kiba la tur hajan baroh kawei ka surok, bad kumta ruh kane hi ka dei ka jingpynkyndit bynriew na ka bynta ka sorkar Meghalaya.”