Pynkhreh ka EKH ban pynlong ia ka elekshon MDC kaba iaid beit iaid ryntih
Ki bor District ka East Khasi Hills ki la pynkhreh ia baroh ki jingdonkam na ka bynta ban pynthikna ban pynlong ia ka elekshon kaba iaid beit iaid ryntih, kaba khuid ba suba bad kaba suk ba sain sha ki 15 tylli ki constituency jong ka Khasi Hills Autonomous District Council (KHADC) kiba hap hapoh u pud u sam jong ka district.
Haba kren sha ki lad pathai khubor ha ka 24 tarik Kyllalyngkot, ka Deputy Commissioner, Kong RM Kurbah ka pyntip ba ka jingpyniaid ia kane ka elekshon ka ban wan kan long na Inter-State Bus Terminus (ISBT) ha Mawiong ha ka jaka jong ka Jawaharlal Nehru Stadium ha Polo.
Ka la ong, “Na ki 15 tylli ki constituency ka KHADC, ka jingthep kyrteng jong ki kyrtong na ki 10 tylli ki constituency kan long ha ISBT, Mawiong, laitylli, kata ka Nonspung, Sohiong bad Sohryngkham kan long ha DC office, Shillong bad artylli, kata ka Pynursla bad Langkyrdem ha ophis u SDO Civil Pynursla.Hynrei, ka jingniew ia ki vote na ka bynta baroh ki 15 tylli ki constitunecy kan long tang ha ISBT.”
Ka DC ka la pynpaw ruh ba ka jingsdang plie biang ia ki skul, ka jingsdang jong ki board eksam bad ka jingdheng kali ki dei ki daw halor ka jingshim rai ban pynkynriah ia ka jaka pyniaid ia kane ka elekshon sha IBST, Mawiong.
Ka la pyntip ruh ba ka sngi ban buh ia ki jingkam bad jingpyrshah ia ka jingpynrung kyrteng ha ka electoral roll ka la kut ha ka 22 tarik Kyllalyngkot bad ia ka electoral roll kaba khatduh yn pynmih ha ka 27 tarik Kyllalyngkot bad ia kaba yn aiti ruh sha baroh ki seng sain pyrthei. Nalor kata la pyntip ruh ba ka ophis ka la dep ban pynlong ia ki jingai jinghikai kaba haduh arsien na ka bynta ki RO, ARO bad ki seng sain pyrthei kumjuh.
Nalor kata, ka DC ka la ong ruh ba ka jinglong jingman jong ka suk ka sain ha ka district ka long kaba iaid beit iaid ryntih lait noh tang ha kawei ka jaka. Katkum ka jingpynpaw jong ka, ka la ong ba ka shnong Mawkynrew ka dang bteng ban don hapoh ka jingpynjari korphiw namar ka jingmih jong ka jingiakynad ba dang shen namar ka jingpyrshah halor ka jingtei ia ka iingskul.
“Ka dang don hapdeng ka jingpynjari korphiw.Kawei ka jaka ka dei ka skul Ramakrishna bad ia kane ka kam yn sa pynbeit noh shen,” ka la kular.
Haba pynbna ba ka Model Code of Conduct (MCC) kan sdang ban treikam naduh ka 27 tarik Kyllalyngkot, ka DC ka la ong, “Ngi la pynmih ia ki jingpynjari kyndon ban pynthikna ba kan ym don kano kano ka jingpynkhein ia ka MCC.Kano kano ka jingpynkhein ia ka MCC yn shim bishar da ka DC bad ki RO.
Ka la pyntip ba ka jingbuh pud ia ki kyrtong ban pynlut ha kane ka elekshon ka long T.5 lak bad ka security deposit ka long T. 3000.
“Baroh ki kyrtong kiba ia aireng ki donkam ban pan jingbit na ka ophis ka DC, SDO na ka bynta ban pynlong ia kino kino ki jingialang paidbah, jingiaid paidbah bad ki rally paidbah. Kane ka kynthup ruh ia ka jingpyndonkam ia ki kor pynsawa.
La khang pyrshah ban rung sha ki jaka thep vote khlem da don ia ki pass ba la ioh na ki returning ophisar,” pyntip ka DC da kaba bynrap ruh, “La khang ban rah pisa palat ia ka T.50,000, hynrei ki nongtrei kam lajong kiba rah pisa palat ia ka T.50,000 ki la dep pan jingbit lypa ha ryngkat ki kot ki sla kiba donkam.Ngi la pynmih ruh ia ka hukum ia ki briew kiba buh tiar siat ba kin wan pyndem noh ia ki.
Ha kaba iadei bad ka jingpyntreikam ia ki mashin EVM, ka DC u la pyntip ba baroh ki mashin EVM ki don hangtei ha ISBT kaba kumba ka long mynta ka dei ka warehouse namar ka don ïa ki mashin EVM jong kiwei ruh ki district ruh hynrei shisien ba ngi la pyntreikam ia ki mashin ngin sa buh beit ha ki strong room ha ka ISBT hi bad nangne ngin sa sam sha ki jaka thep vote bapher bapher ha ka tarik ban pyntip ha ka sngi Nyngkong ka ban wan.
Facebook
Instagram
Youtube
Twitter
Leave a Reply