Pynkhreh ka JHADC ban wanrah iaka Clan Bill ha ïing dorbar: Lasky Rymbai
JOWAI: U Ma Lasky Rymbai Deputy Chief Executive Member (Dy. CEM) Jaiñtia Hills Autonomous District Council (JHADC) ula ong ba ka konsil kala long kaba pynkhreh ban wanrah ïaka ‘Clan Bill’ haka dorbar ban ithuh lyngba ka aiñ ïaki kur ki jait, ka synjuk ki kur ban pynkhlain ïaka riti ka dustur bad ban tehlakam na ki riew shim kabu kiba pyndonkam bakla ïaka ka kur jait.
“Da kane ka Clan Bill kan pynkhlain ïaka bor jong ki synjuk kur ba kin lah ban ai syrnod Clan Certificate nalor ban buh jingthoh ia baroh ki jait kur ha Rilum Jaintia,” ong u Dy. CEM.
![](https://www.syllad.com/wp-content/uploads/2024/09/JIT-Vacancy-823x1024.avif)
U Ma Lasky ula ong ia kane haka Dorbar Kyrsu kyntu ka Seinraij Wapung Shnong, kaba hap hapoh ka Seinraij Tuber ha Madan Shad Sukra haka Sngi U Blei.
Hashwa ban ioh jingkren la sdang iaka dorbar da ka jingpynher ïaka lama ka seinraij Wapung da ki longkmie ba kynthup ïaka Ieris Ryngkhlem bad ka Pretty Dkhar ryngkat ka nguh ka dem blei da u Rgh, Kduplang Ryngkhlem bad ïaka Dorbar la pyniaid da ka samla Damutmiki Dkhar President Seiñ Raij Shnong Wapung Shnong.
U Rgh Bewill Sylla President ka Seiñ Raij Tuber ula kren halor ka phang “Ka Maian Blai ha u Ynniaw Wasa”. Haka jingkren ula ong ki khun samla haka juk mynta kim sngewthuh ïaka jingmut jong ka ‘Kyntien Maian Blai’ kaba mut ka kyntien kaba pyniasoh lang hapdeng u khun Ynniaw Wasa Ynniaw Wasung bad u Trekirot uba long u syiem jong ki jingthaw baroh ha ka pyrthei.
Ula kyntu ïaka pateng mynta ban pynneh pynsah ïaka niam ka rukom kaba ki longshwa manshwa ki la buh ryngkat ka bor ki Blei.
“Ki khun u ynñiaw wasa ynñiaw wasung kim lah ban leh kulmar ïa kano kano ka kam Niam kam Rukom khlem da ioh ka jingbishar na u Trekirot,” ula ong u Bewil bad Ula pynkynmaw ruh ba ka pyrthei ka don lai syrtap kawei kadei ka Sih Bneng, ka pyrthai Shong basa bad ka Niam Ra.
Ka Kong Juliana Margret Papang Adviser Seiñ Manbei Khlieh Muchut Moolibang Shangpung ka la kren halor ka phang “Ka kamram ki samla bad longkmie haka Niam”.
Haka jingkren ka la kyntu ïaki samla shynrang bad kynthei kumjuh ki longkmie ban long ki nongpeit pyrman haba don kano kano ka jingleh niam leh rukom hapoh ka Seiñ Raij ne ha iing ha sem bad kidei ruh ban shim bynta haka kam niam kam rukom khang ba kin ioh ka jingshemphang hadien habud.
U Daloi ka Elaka Jowai u Rgh. Puramon Kynjin ula kren halor ka phang “Ka Niamtre, Ka Niam Tipbru Tipblai”.
Haka jingkren ula ong, ka Niamtre ka hikai ban im tip-briew tip-blei ban burom para briew bad ban burom ia u Blei bad kyntu ruh ban burom iaki kha ki man kumjuh ki para marjan marpa.
U Moonlight Ktung President Seiñ Kyntu Seiñ Raij 12 Daloi ula kren halor ka phang “Ka Niam katam i thaw”. Ula ong wat lada la don ha kawei ka Niam hynrei ka pher ka rukom lehniam na kawei ka Raij sha kawei Raij.
Ula ai nuksa ruh ïaka rukon leh niam ka Raij Nartiang bad ka rukom leh Niam ka Raij Tuber kaba ïapher na kiwei ki lehniam bad kyntu ban nang pynkhlain shuh shuh iaki jingleh niam ha la ki jong ka raij ba ki don.
La pynphuh pynphieng ia kane ka Dorbar Kyrsu Kyntu da ki jingshad tynrai na ki tnad Seiñ Raij bapher bapher kynthup ka Seiñ Raij Mukhla, Seiñ Raij Narwan, Seiñ Raij Rashai, Seiñ Raij Khloo Kynrin kumjuh ka Seiñ Raij Shnong Wapung Shnong bad Seiñ Raij Shnong Tuber Shohshrieh.
La pynkut ïaka Dorbar da ki kyntien khublei na ka longmkie Chemsuk Dkhar bad la pynhiar ïaka lama ka Seiñ Raij Shnong Wapung Shnong da u Rgh Chalanbha Dkhar Adviser ka Seiñ Raij Shnong Wapung Shnong.
Leave a Reply