Pynkhreh ka MBA ban hikai bad jied nong ia kura sha North East Olympic Games

Syllad | The Rising MeghalayaOctober 12, 2022

Kum shi bynta ka dak jong ka jingsdang ban pynkhreh ia ka jingpynlong ia ka lympung bah ialehkai 2nd North East Olympic Games 2022, kaban long hangne ha ka nongbah Shillong naduh ka 10-16 tarik u bnai Naiiwieng 2022, ka Meghalaya Boxing Association (MBA) ka la lum lang ia ki rang bad thei ia kura ba tbit bad ba kynsai ban pynlong ia ka prokram jingpyrshang bad ai jinghikai ne ka selection cum coaching camp kaban neh san sngi lynter, ba la sdang ia ka naduh ka 11 tarik bad kut ha ka 15 tarik mynta ka taiew.

Ia kane ka jingpyrshang bad ai jinghikai bad ban bynrap da ka jingjied ia ka kynhun ban mih khmat ia ka jylla sha kane ka jingiakob la pynlong ha Indoor Stadium jong ka Mawlai Mawroh, ha kaba ka jingdon ki khynnah ka kynthup na jan baroh ki distrik ba don ha ka jylla bad bynrap lang shuh shuh sa na ki synjuk ne ki klob ialehkai boxing.

Ha kane ka kynti, ka MBA ka la shimkhia wat ba kan da pynbiang ruh ia ka jaka ban shong ban sah ki kato katne ki rang bad ki thei ia kura ba wan na sha kiwei pat ki distrik, kaba ha kane ka kynti kaba myunta kine ki khynnah  ba wan na shabar la pynsah ia ki ha Fr Otto Hopffenmuller SDS, ha Mawlai Mawroh

Na ka liang u bah Larry Kharpran Secretary ka MBA bad ha ka juh ka por ba dei u Boxing Coach jong ka jylla, ha kaba nyngkong u sngew ban ai khublei ia ka tnat Sports  kaba la wan shakhmat ban iarap bei tyngka sha ki 18 tylli ki jait jingialehkai ban pynlong ha kane ka lympung bah ialehkai ka thain, ha kaba kawei na kine dei ka boxing.

Ha kane ka kynti jingiakob, ka boxing kan don haduh khyndai tylli ki kyrdan iakhun ne weight category naka bynta ki shynrang bad phra na ka liang ki khynnah kynthei.

Haba iadei bad ki shynrang u bah Larry u kam ba ka MBA ka lah ba kan ioh ban sei madan pura ha baroh ki 9 tylli ki kyrdan iakhun haba ia nujor pat ia ki khynnah kynthei ka synjuk ka kham duna ha ki kyrdan jingkhia kiba kham heh katta kumha ka 60kg, 63 kg bad 66 kg.

U bah Larry u sngew ban ai khublei kyrpang ia ka dorbar shnong ka Mawlai Mawroh kaba la ai kylluid mynsiem ia ka MBA ba kan pyndonkam ia kane ka indoor stadium kaba dei artad ka boxing hall, ha kaba la ioh mynta ban ai ia kane ka jingkilan met bad jied ia ka kynhun ki rang bad thei ia kura jong ka jylla ban iakhun sha kane ka lympung ialehkai ba heh ka thain.

Haba iadei ba dka jingduna ban ioh sei madan ia la ka kynhun ki thei ia kura ha kane ka rynsan iakhun, u bah Larry u la batai kham shai ba ka daw jong ka jingbym lah ban sei madan pura ia ka kynhun ki thei ia kura ka jia liong namar ba ha ki kyrdan iakhun kiba kham shalor ka jingiashim bynta da ki thei ia kura ka dang duna bad kane ka jingduna kam dei tang ha ka jylla hynrei wat haduh ka kyrdan iakhun jong ka national championship ruh ka jingdon ki thei ia kura ka long hi kaba duna.

Ia kane ka jingpyrshang bad jingkilan ia ki nongialehkai ka MBA ka don hapoh ka jingpeit bad khmih u bah Larry lem bad u Dondor Marweiñ ba long kum u Assistant Coach ia kane ka prokram kaba mynta bad lada donkam lehse ka MBA ka lah ruh ba kan khot lang ia ka Roshni Bhusal kaba dei ruh ka Assistant Coach jong ka kynhun  ia kura jong ka ri.

U Bah Larry u iathuh ba hadien kine ki san sngi, ka MBA  ynda haba kala dep ba kan jied pura ia la ka kynhun, naduh ka 17 tarik mynta pat u bnai, kan don ka jingai jinghikai kaba paka bha ia baroh ki rang bad thei ia kura ba la shah jied ban mihkhmat ia ka jylla ha kane ka kynti iakhun kaba mynta ka North East Olympic Games.

Haba jubab halor ka jingkylli la kum u nongpeit bad khmih u donkam ne em ban wanrah ruh ia ki nonghkai ne ki coach kiba tbit ba kynsai wat naduh ka shlem, ai jinghikai ka NIS Patiala ban wan ban iadon lang mynta shipor bad kane ka kynhun, halor kane u bah Larry u pynpaw ba ka long kaba donkam ban don ia ki coach kiba kham tbit,m hynrei haba khmih pat ia ka por, ia mynta hi ka la long kaba khim shaba palat, hynrei u u kyrmen skhem ba da ka jingdon pat ka jylla sa ia kumba kato katne ki coach kiba tbit bad ba kynsai kan iarap ban phrang ia la ka kynhun bad lada u donkam eh, kaei kaba u lah ban leh ka long ba un ia syllok ne ia phylliew jingmut bad ki coach paralok ki jong u.