Pynkhreh ka Meghalaya HC ban shim da ka suo motu case lada ym lah weng ia ki jingeh ha ka skulbah NEHU

Syllad | The Rising MeghalayaNovember 14, 2024

Ka Iingkashari Meghalaya High Court ha ka 13 tarik u Naiwieng ka la pynpaw ba kan pyrkhat ban shim noh da ka suo motu case lada ym lah ban weng ia kane ka jingeh kaba dang iai bteng ha ka skulbah North Eastern Hill University (NEHU).

Ka iingkashari ka dang bishar ia ka PIL kaba pan ia ka jingiarap jong ka ban pynmih ia ka hukum na ka bynta ban lah ban pynneh biang ia ka jinglong jingman kaba jai jai bad na ka bynta ka jingpynbeit beit ia kane ka jaka pule kaba la don hapdeng ka jingkhang dam namar ka jngiakhih ba khlem buh por da ki seng jong ki samla pule ba la ialam da ka North Eastern Hill University (NEHUSU) bad ba la kyrshan da ka Khasi Students’ Union (KSU-NEHU Unit) mynta lah khyndai sngi kynthih ban dawa weng mardor ia u Vice Chancellor u Prof PS Shukla kumjuh ia u Registrar bad u Deputy Registrar.

Ha ka hukum jong ka, ka kynhun ki nongbishar kaba kynthup ia u Chief Justice Indra Prasanna Mukherji and Justice B Bhattacharjee ki la ong, “Ngi shim judicial notice ia ka jingshisha ba ka sorkar Jylla ka la ai katto katne ki jingai jingmut sha ka Sorkar Pdeng na ka bynta ban pynbeit ia kane ka jingeh kaba mih ha kane ka skulbah mynta bad ba ka Sorkar Pdeng ka dang pyrkhat ia ki lad ki lynti ban pynbeit ia ki.”

“Namar ba ka jingpyniaid ia ka University ka dei kaba la khmih da ka Sorkar Pdeng, kumta ruh ngi don ka jingmut ban ai por na ka bynta ban pynbeit ia kane ka jingeh. Hynrei lada kine ki jingeh ki dang iai bteng haduh ka tarik ba la buh biang ia ka jingbishar, ngin sa pyrkhat ban shim da ka suo motu case ia kane ka kam bad shim ia ka rai,” ka la ong.

“Ngin sa bteng ban shim judicial notice halor ka jinglong jingman,” ka la bynrap.

Ka Iingkashari ka la bthah ruh ba u nongmudui un pyntip ia kane ka hukum sha baroh kiba don bynta kynthup ia ka Sorkar Pdeng bad Sorkar Jylla, u Vice Chancellor, ki seng jong ki nongtrei bad ki samla pule.