Pynkhreh ka North Liberty HSS ban iaknieh nam lahduh ar tylli ki kyrdan ha Subroto Cup ha Jowai

Syllad | The Rising MeghalayaJuly 1, 2023

Ka North Liberty Higher Secondary, Jowai kala long kaba pynkhreh ban iaknieh iaka nam lahduh ha ki ar tylli ki kyrdan, kata haka Under -17 Girl’s bad Under-17 Boy’s haka jingiakhun final jong ka Subroto Cup kaba pyniaid da ka ophis u District Sports Officer, West Jaintia Hills District.

Kane ka jingiakhun final kan long haka 3 tarik Naitung ha Kiang Nangbah Satadium.

Nakaliang ki kynthei ka North Liberty Higher Secondary School kan ai reng pyrshah iaka Kiang Nangbah Higher Secondary School. Katba na ki rang pat kan aireng pyrshah iaka Government Boy’s Higher Secondary School, Jowai. Kine ki jingiakhun final kin long haka por 10 baje mynstep bad 1 baje nohphaisngi.

Ka jingiakhun final haka Under-14 Boy’s pat kan long hadpeng ka Lumpyrtuh Secondary Schoool pyrshah iaka HK Singh Memorial Secondary School bad kane ka jingiakhun kan long haka por 11 baje mynstep.

Haba phai sha ka jingiakhun semifinal Under-14 Boy’s kaba long mynta ka sngi Saitjain, ka namjop ka Lumpyrtuh Secondary School ka long pyrshah iaka Laishnong Higher Secondary School. Ha kane ka jingiakhun ka Lumpyrtuh kala jop da ka tie breaker da 3-1.

Haka semifinal kaba ar, ka HK Singh kala pynliem da ka tie breaker da 4-3 iaka RC Evening Sec. School.

Haka Under-17 Boy’s, ka Saw Lyngdoh kala shah pynliem daka tie breaker da 3-4 haka Govt Boy’s bad ka North Liberty kala jop da 2-0 pyrshah iaka Ummulong Prebyterian Higher Secondary School.