Pynkhreh ka NPP ban thaw ia ka EC ba thymmai ha JHADC

Syllad | The Rising MeghalayaFebruary 25, 2025

Ka National People’s Party (NPP) ka la pynkhreh ban thaw ia ka Executive Committee (EC) ba thymmai ha Jaintia Hills Autonomous District Council (JHADC) hadien ba ka la ioh ia ka jingkyrshan bad kynjoh sha ka 18 ngut ki MDC.

Haba pynbna ia kane hadien ba la khot ia ka jingialang haka 24 tarik Rymphang, u General Secretary ka NPP uba dei ruh u Symbud Myntri Rangbah ka Jylla u Bah Sniawbhalang Dhar u la ong,

“Ngi ai khublei ia ki paidbah ka Rilum Jaintia halor ka jingshaniah kaba ki la ai ia ka party NPP da kaba pynjop haduh 13 seat.”

U pyntip ruh ba ka jingkhlain jong ka NPP ka la kiew sha ka 14 ngut da ka jingwan pyniasoh jong ka kyrtong khlem seng na Rymbai-Khliehriat constituency ka Kong Violent Lyngdoh sha ka party.

“Ngi la khot ruh ia ka jingialang bad ki paralok synrop jong ngi, ka United Democratic Party (UDP), kaba la jop 3 seat bad u kyrtong khlem seng na Jowai South u Bah Moonlight Pariat, bad da ka jingkyrshan ka jong ki ngi la shim ia ka rai ban thaw ia ka EC kaba thymmai ha JHADC da ka jingdon jong ki 18 ngut ki MDC,” u la ong.

U Bah Sniawbhalang u pyntip ruh ba ka jingialang ka rai ba kan thung biang ia u ma Thombor Shiwat kum u Chief Executive Member (CEM) jong ka JHADC.

Halor ka jingbym lah lehbha jong ka party ha KHADC, u Dhar u la ong, “Ngi la ioh tang 4 seat na Khasi Hills.Ngin sa iit bniah ban lap ia ka daw halor kane.”

Haba kyntait ia ka jingkynnoh ka VPP halor ka jingpyndonkam bor hapoh Rilum Jaintia, une u nongialam ka NPP u la ong, “Ki la ioh 17 seat ha Khasi Hills, hato kata ka mut namar ba ki la pyndonkam da ka bor? Kumta kam ju don kaba kum kata ha ka politiks, ki paidbah ki ioh ban pyndonkam ia la ki jong ki hok da ka jingkmen.”

Nalor kata u la ong ruh, “Ka VPP ka la lah ban jop tang 17 na ki 29 tylli ki constituency ha Rilum Khasi. Ka jingioh jingkyrshan ka la hiar shibun haba ia nujor bad ka elekshon MP kaba la dep ha kaba ki la jop na baroh ki 29 tylli ki constituency hapoh Khasi Hills. Kumta ruh tang hapoh ka 8-9 bnai, ki la lah ban jop satang 17 na ki 29 tylli ki seat.”

Ha kajuh ka por une u nongialam ka NPP u pyntip ruh ba ka jingialang jong ka MDA kan long lashai ka sngi 25 tarik Rymphang ban iakren ha kaba iadei bad kane ka elekshon ADC