Pynkhreh ka Regional Committee ka WJH ban aiti ia ka kaiphod pynbeit pud hapoh ka ar bnai

Syllad | The Rising MeghalayaDecember 19, 2024

Ka Regional Committee ka West Jaintia Hills ka la shim ia ka rai ban aiti noh ia ka kaiphod pynbeit pud jong ka sha ka Sorkar Jylla hapoh kine ki ar bnai ban wan.

Haba pyntip ia kane hadien ka jingialang kaba la long ha ka 19 tarik Nohprah, u Chairman ka Committee bad Symbud Myntri Rangbah ka Jylla u Bah Sniawbhalang Dhar u la ong, “Ngi la bthah ia ki bor district ba kin pynkhreh ia ka kaiphod ha kaba iadei bad ki shnong kiba hap hapoh Block-I, ha kaba ki la kyrpad ban ai por ban pyndep hapoh kine ki shi bnai ne ar bnai.”

“Mar ia dep pynkhreh ia ka kaiphod, ngin sa aiti sha ka sorkar Jylla ka ban sa bishar bniah hashwa ban iakynduh ia ki bor ba dei khmih ka sorkar Assam.” u la bynrap.

Ha kaba iadei bad ka jingdawa ban pynphai biang ia ki 36 tylli ki shnong kiba hap hapoh Block I shapoh Meghalaya, u Bah Sniawbhalang u la ong, “Hooid, ki la pynpaw ia ki jingsngew jong ki halor kane ka kam, bad ngi la shim lut ia baroh ki mat bad ki jingkyrpad jong ki. Hynrei baroh ki ar sorkar Jylla kin shong jingialang bad ki artylli ki Regional Committee (bad da kaba pynshong nongrim ia ki kaiphod jong ngi) kin sa shim rai halor kane ka phang.”

U la pyntip ruh ba ka Regional Committee kan sa shong jingialang biang ha ka taiew kaba ar ne kaba lai jong u bnai Kyllalyngkot u snem 2025. Nalor kata une u Myntri u pyntip ba ka Committee ka la iatai ruh halor ki jingjia kiba iadei bad ki jingpyntrei jong ka Assam ia ki jingtei ha ka thain Block-I.

“Ngi la ai ka jingbthah ia ki bor district ba kin leit ban pynsangeh ia ka jingpyntrei namar ba kane ka jaka ka hap ha ki bynta kiba don hapdeng ka jingiakajia,” u la ong haba ban jur halor ka jingdonkam ban pynneh ia ka status quo.

Ha kawei pat ka bynta, u Symbud Myntri Rangbah u la iai ban halor ka jingkongsan jong baroh ki ar jylla ban shah ia ki jingpyntrei kiba iadei bad ka roi ka par halor ki kyndon ba dei ban da pyntip sha ki bor district ba dei khmih, kata ka bym shym la long kumta ha kane ka jingjia kaba dang shen.

Haba pynpaw ba ka sorkar ka la kut jingmut skhem ban pynbeit ia ki kam khappud, u Bah Dhar u la ong ba u Myntri Rangbah ka Assam bad Meghalaya shen kin sa ia pynbeit ia ka tarik ban leit jurip ia kine ki jaka kiba don hapdeng ka jingiakajia.

“Watla kam shym la don ka jingbuh por na ka bynta ka jingiakren pynbeit pud ha ka kylla kaba ar, hynrei ngi la pyrshang ban lah ban pynbeit kloi katba lah ia kane ka kam ,” u la bynrap.