Pynkhreh ka seng Hindu ban wan pynbna ia ka masi kum ka kmie ka Ri ha Shillong

Syllad | The Rising MeghalayaSeptember 13, 2024

Ka seng ki Hindu hapoh ka jingialam jong u Jyotish Peethadheeshwar Shankaracharya Avimukteshwarandah ka la pynkhreh ban pynlong da ka ‘Gau Dhwaj’ ban pynbna ia ka masi kum ka kmie jong ka Ri ha ka nongbah Shillong ha ka 2 tarik u Risaw u ban wan.

Kane ka Seng Hindu kam shym la lah satia ban pynlong ia ka jingialang bad ki lad pathai khubor ha kaba iadei bad kane ka bynta hadien ba kas seng Hynniewtrep Youth Council (HYC) ka la leit ban pynpaw pyrshah hakhmat ka Shillong Press Club haka step 12 tarik Nailur. Na ka liang ka tnat pulit ruh ka la pynjur ia ka jingpahara shabar jong ka Club ha kane ka jingwan tur jong ka seng HYC.

Hynrei, na ka liang u Yogiraj Shailendra ha ka jingkren u la kam da kaba ong, “Ngi la pan jingbit la bunsien na ka bynta ban pynlong ia ka jingialang bad ki lad pathai khubor lyngba ka Press Club Shillong hynrei ngi khlem ioh pdiang satia. Kumta ngim lah shuh ban pynlong ia kane ka jingialang.”

Lyngba u kyrwoh la pyntip ruh ba u Shankaracharya un sa wan sha Shillong ha ka janmiet jong ka 1 tarik u Risaw u ban wan. Katba ha ka 2 tarik kaba bud un sa pyniaid ia ka jingialang na ka bynta ban pynlong ia ka ‘Gau Dhwaj’ bad ai jingkren ha ka Gau Mahasabha. Hadien kane un bteng ia ka jingleit ka jong u sha West Bengal.

“Ka thong jong kane ka Gau Dhwaj Sthapana Bharat Yatra ka long ban kyrsiew thiah ia ki nongmane ia ka masi ha baroh kawei ka ri, ban pyniatylli ia ki na ka bynta ka daw bah ban pynneh ia ka burom bad ka iktiar jong ka jingkyntang ka Masi, bad ruh ban pynkup da ka burom ia ka Masi ha ka kyrdan ‘Rashtra Mata’;” ong u kyrwoh.

Nalor kata kane ka Seng ka pyntip ruh ba ia ka ‘Gau Dhwaj Sthapana Bharat Yatra’ yn sdang naduh ka 22 tarik mynta u bnai.