Pynkhreh ka sorkar da ka surok 8 lane na Khanapara sha Byrnihat, 4 lane na Umroi sha Jaintia Hills: Dy CM

Syllad | The Rising MeghalayaMarch 15, 2024

U Symbud Myntri Rangbah ka Jylla uba khmih ruh ia ka Tnat Transport, u Bah Sniawbhalang Dhar u la ong ba ki la iakren bad ka sorkar Pdeng ban mang pisa na ka bynta ban shna ia ka surok eight lane na Khanapara sha Byrnihat bad ka surok four lane na Umroi sha Jaintia Hills khnang ban pynsuk ia ka leit ka wan bad pynduna ia ka jingdheng kali.

Haba kren ha ka jingialang ialap ilekshon ha ka 14 tarik mynta u bnai ha Byrnihat, Ri Bhoi District ban pan jingkyrshan ia ka kyrtong MP jong ka Seng National People’s Party (NPP) ka Kong Ampareen Lyngdoh, u Dhar u la pyrto ruh ia ka jingtrei shitom jong u MLA ka Jirang u Bah Sosthenes Sohtun na ka bynta ban kyntiew ia ka ioh ka kot bad ka roi ka par jong ka constituency.

U la ong ba une u MLA um shym la shongthait ban iakren bad u CM man la ka janmiet na ka bynta ka roi ka par ka constituency jong u.Kumta la sakhi ba kane ka constituency kam shym la duna la ka long ha ka liang ki surok, ka umbam um dih, ka pule puthi bad kiwei pat ki bynta.

Nalor kata u la bynrap ruh ba ka Jirang bad ka Ranikor ki dei napdeng ki consituency ki ba la ioh pdiang ia shibun ki kam pynroi lyngba ka sorkar.

Katba na ka liang u MLA barim ka Sohiong u Bah Samlin Malngiang haba kren ha kane ka jingialang ba la pyniaid da u MLA ka Jirang u la ong ba ka NPP ka dei ka party kaba don ia ka nongrim bad kaba don ia ki nongialam kiba shemphang kum u Conrad K Sangma bad ki arngut ki deputy CM, kata u bah Prestone Tynsong bad u Sniawbhalang Dhar.

Kumta u la ong ba ki paidbah ki dei ban ai ka jingkyrshan kaba pura ia ka NPP ha kne ka Lok Sabha ilekshon ka ban wan khnang ban pynthikna ia ki kam pynroi ha baroh ki liang.