Pynkhreh ka Sorkar ia ki sienjam ban weng ia ki jingeh jong ki nonghikai SSA: Rakkam

Syllad | The Rising MeghalayaSeptember 16, 2024

U Myntri ka Tnad Pule Puthi Rakkam A Sangma haka 16 tarik Nailur u la ong ba na ka liang ka Sorkar Jylla ka la pynkhreh ia ki sienjam (formula) na ka bynta ban lah ban weng ia ki jingeh kiba ki nonghikai SSA ki iakynduh.

Haba kren sha ki lad pathai khubor u Myntri u la ong, “Ngi dang pynkhreh ia ki lad ki lynti bad ki sienjam ban leh ei ei halor ka mat kaba iadei bad ki nonghikai SSA ha kine ki sngi ki ban wan.” Ia kane u la pynpaw haba jubab halor ka jingdawa jong ki nonghikai SSA ban pynkiew ia ka tulop jong ki hapoh jong une u bnai.

U Rakkam u la ong ba kane ka jingdawa jong ki nonghikai SSA ka dei kaba shonghok bad na ka liang ka Sorkar ruh ka la pyrshang ia kaba bha tam ban pyniabiang ha kaba iadei bad kane ka bynta. “Ngi la kyrpad ia ki ba kin long kiba iai shah bad ka Sorkar,” u la ong.

U Rakkam u pyntip ruh ba ha ki por kiba la dep ka rukom ioh ia ka song pisa na ka bynta ka tolp SSA ka long da 90:10 bad mynta ka Sorkar ka la kyntiew da 5% man la u snem ia ka tulop jong ki nonghikai SSA, bad bynrap ba mynta ka long tulop ka long da 30:70 bad ha u snem u ban wan ka kot sha ka 35:65.

“Ngi la kyntiew 5% man la u snem ia ka tulop jong ki nonghikai SSA hynrei kane ka rukom siew kam shym la iaid satia. Balei? Namar ka Sorkar India ka la nangkhate 5% man u snem na ka song tulop jong ki nonghikai SSA,” u la ong da kaba aiksai ba “Lehse ba ha ki 3-4 snem ki ban wan ka lah ban long 50:50, kaba mut 50% ia kaba yn hap bei da ka Sorkar Jylla bad 50% da ka Sorkar Pdeng. Kumta ha kaba kut ka sngi hi, lehse ka Sorkar India ka lah ban aiti sha ka Sorkar Jylla. Ngi tip ia ki jingeh jingtynjuh bad na ka liang ka Sorkar ka la pynkhreh lypa ban wad ia ki rukom treikam bad ki sienjam kumno ban shimti noh ia ki nonghikai bad ban weng ia ki jingeh.”

Ha kaba iadei bad ki skul SSA ki bym don khynnah, u Myntri u la ong ba la bthah ia ka Committee ka ban wad bniah halor ki jingshisha ba kin leit jurip ia ki skul ban sngewthuh ia ki jingeh kiba kum kine ki skul ki iakynduh.

“Ngi sngewthuh ba ki don buntylli ki skul ki bym don khynnah satia. Ki don bun ki skul ba ki nonghikai kim ju leit sha skul. Ki don bun ki skul kiba don da ki nonghikai ba la shu thung bujli. Ki don bun ki skul kiba don tang hapoh ka 10 ngut ki khynnah skul. Ki don bun ki skul ki bym don ia ki iingskul. Ki don bun ki skul ba bun da ki nonghikai ia ki khynnah skul.Ki don bun ki skul kiba don 4 ngut ki nonghikai bad 2 ngut ki khynnah. Kumta ngin phah ia ka committee ka ban wad ia ki jingshisha khnang ba ngin ioh ia ki jingtip kiba bniah ha kaba iadei bad ki nonghikai bad ki skul.Ha kajuh ka por ngi dang pynkhreh ruh ia ki sienjam kumno ban shimti noh ia ki nonghikai la ki dei ki SSA, ki Adhoc, Deficit namar ngi dei na kajuh ka longiing.”

Kumjuh haba pynpaw ba ka Meghalaya ka dei ka Jylla kaba don bun eh ki khynnah kiba pep skul shiteng por hapoh ka Ri bad kaba hatrai eh ha ka PGI ranking, u Myntri u la ong ba kane ka don beit beit ia ka jingiadei halor ka rukom aijingshkari jong ki nonghikai.

“Ka jinglong jingman ha ka pule puthi khamtam ha ki kyrdan Lower Primary ka dang duna shibun. Ngi pynshlur ia ki nonghikai ba kin pynleit jingmut ia la ki kamram jong ki bad ki dei ban ai ia ka jinghikai kaba bha tam bad na ka liang ka sorkar ka dang peit ia ki lad ki lynti halor ki sienjam kiba ka lah ban leh. Ngi la shong jingialang bad u Myntri Rangbah bad na ka liang u Myntri Rangbah u la kyntu ia ka Tnad ba kan ai ia ki jingpynshai kiba bniah hashwa ba ngin jan shakhmat,” u la ong.

Shuh shuh u Myntri u la ong ruh ba na ka liang ka Tnad kan sa shim ia ki sienjam pyrshah ia kito ki nonghikai kiba bynshet ia ka kam jong ki sha kiwei pat ki briew. “Lada ngi ioh pdiang ia ka jingujor na kino kino ki briew, ka ain kan leh ia kaba donkam. Ka Tnad kan leh tyngeh beit pyrshah ia kiba kum kine ki nonghikai,” u la ong.