Pynkhreh ka sorkar iaki buit ban iarap kyrshan pisa sha ki seng samla ong u CM Conrad

Syllad | The Rising MeghalayaJuly 3, 2023

U Myntri Rangbah jong ka sorkar jylla Conrad K Sangma ula ong ba ka sorkar ka dang pynkhreh shait shait iaki buit thymmai ban iarap kyrshan pisa sha ki seng samla naka bynta ki kam bapher bapher.

Ia kane u CM ula ong haka jingrakhe iaka jingdap shi snem pura ka jingpyntreikam iaka Yess Meghalaya ne ka Youth Engagement Through Empowered Youth Organisations kaba long Banquet Hall, Pinewood Hotel haka sngi Nyngkong.

U Myntri Rangbah Conrad K Sangma, ula ong ba ka don ka jingbym biang kaba bun bha ki liang haba phai sha ki kam ba ki samla ki kwah ban leh bad ka jingkyrshan ba ki ioh ban pyntreikam iaki kam ba ki thmu ban leh. Ula ong ruh ba ki bun ki seng samla bad ki kynhun kiba leh iaki kam khlem kano kano ka jingkyrshan naka sorkar bad ki leh hi dalade bad kane kalong namar ba ki ieit ne sngewtynnad iaka kam.

Kumta ka sorkar kala plan bad thaw ia ki lad ki lynti bad ki buit treikam khang ban lah ban ai jingkyrshan pisa sha ki kynhun jong ki seng samla, la ong u CM bad bynrap ba haduh mynta la pyntreikam iaka lyngba ka Chief Minister’s Secretariat bad mynta la yn aiti noh iaka sha ka Sports & Youth Affairs Department.

Ula iathuh ruh ba kan sa don kiwei ki prokram iaki nongsengkam, ki nongput nongtem, ki nongialehkai bad ki nongshna phlim ba kin ioh pynpaw sha ka pyrthei ia ki kam jong ki bad ki jingjop ba ki ioh khnang ba kiwei ki samla kin ioh mynsiem lang.

Ka Yess Meghalaya ka dei ka prokram kaba pynkup bor iaki samla bad ka jingyntreikam iaka kala long kaba jop bad ki samla kiba bun kila wan shakhmat bad ula kyntu iaki samla bad ki kynhun ban pynrung kyrteng ialade khnang baka sorkar kan lah ban ai ka jingkyrshan.

U Myntri Rangbah ha kane ka jingrakhe iaka jingdap snem ka Yess Meghalaya ula pyllait paidbah ruh ia ki kyndon ba thymmai jong ka bad ula sam ruh ia ki cheque sha ki nongioh myntoi haduh 38 tylli ki kynhun bad ka pisa kala kot sha ka 9.8 lak tyngka. Ha kane ka shisnem, ka Sorkar kala pyllait haduh T. 4.5 klur sha ki palat 1300 tylli ki kynhun jong ki samla.

Ha kane ka jingrakhe iaka jingdap shisnem ka Yess Meghalaya la iadonlang u Myntri kam ialehkai Bah Shakliar Warjri, Commissioner & Secretary ka Tnad Sports & Youth Affairs Dr Vijay Kumar D bad Director ka Sports & Youth Affairs Kong Isawanda Laloo.