Pynkhreh ka tnad Education ia ka blueprint ban pynbeit halor ki jingeh ki Nonghikai SSA

Syllad | The Rising MeghalayaDecember 12, 2024

Ka tnad Education ka la pynkhreh da ka blueprint halor kumno ban shim ia ki sienjam ban lah ban pynbeit noh kham kloi halor ki jingeh kiba iadei bad ki nonghikai SSA.

“Ka Tand Education ka dang pynkhreh ia ka blueprint kaba pura bad kan sa rah sha ka sorkar Jylla ha ka 9 lane ka tarik u Kyllalyngkot 2025,” ong u Myntri ka Tnad pule puthi u Rakkam A Sangma haba kren sha ki lad pathai khubor ha ka 11 tarik u Nohprah.

Lah ban kdew ba ka Meghalaya SSA Schools Association (MSSASA) ka la dawa na ka sorkar ba kan wanrah da ka policy ka ban ai ka jingshngain ha ka jingshakri jong ki palat 13,000 ngut ki nonghikai SSA, katba ka All Meghalaya SSA School Teachers Association (AMSSASTA) ka la dawa na ka byna ka jingpynkiew tulop.

Da kaba pynpaw ba ka sorkar ka don ia ka jingkut jingmut ban pynbeit ia ki jingeh jong ki nonghikai, u Myntri u la ong, “Ka jingpynkhreh ia ka blueprint ka la sdang iaid. Ka long ka jingshisha ba ka dei ka jingtynjuh. Watla katta ka lynti ka don haba don ka mon. Kumta ka sorkar ka don ia ka mon bad khlem artaien ba ngin shem ia ka lynti.”

Haba kylli, u Myntri u la ong, “Ka Tnad ka tip halor ki jingtynjuh bad ki jingeh kaba ki nonghikai ki la mad, hynrei ki don shibun ki jingeh hangne hangtai, ngin hap ban wanrah sha ka jingtip jong ka sorkar halor kumno yn leh – Lada dei ban pyrkhat ia kata kaei kan sa jia bad kaei ka jingktah namar ka pule puthi ka iadei bad baroh ki bynta.”

“Kumta, hooid ngi la pynkhreh ia ka blueprint bad ban rah sha ka sorkar. Ngim tip la kan mynjur ne em hynrei ngi la pyndep ia ka kam kumno ban wad ia ki lad ki lynti ki ban neh na ka bynta ban lah ban weng noh shisyndon ia kine ki jingeh,” u la bynrap.

Shen yn thung ka Sorkar haduh palat 1000 tylli ki kam nonghikai ha ki skul bad college haka Jylla