Pynkhreh ka tnad Water Resources iaka projek ban iada na ka jingshlei um ha Wah Myntdu

Syllad | The Rising MeghalayaNovember 23, 2023

Ka jingpynsngew paidbah ne Public Hearing ba la khot pynlong da ka tnad Water Resource, West Jaintia Hills haka 22 tarik Naiwieng ka la long kaba iaid beit iaid ryntih da ka jingwan iashim bynta ki dkhot ka Pynthornein Farmers Association, ki trai hali, ki bor pyniaid shnong jong ka Ladthadlaboh, Mihmyntdu, Rud Myntdu, ka seng Ka Khooid Ya ka Wah Myntdu.

Iaka jingialang la pyniaid da u Extra Assistant Commissioner, West Jaintia Hills District bah Sylvester Phanbuh.

U P. Kurbah, Executive Engineer, Water Resource Department bad u Nangtiaki Tariang, SDO Water Resource Department, West Jaintia Hills ki la iathuh iaka jingangnud jong ki ban leh ia kaba bha tam na ka bynta ka jingmyntoi jong ki nongrep ha Pynthornein khamtam ban lait ki hali pynthor kumjuh u kba u khaw na ka jingshah ktah haka por ba jur u slap bad shlei ka Wah Myntdu.

U Nangtiaki Tariang, SDO Water Resource Department, West Jaintia Hills ula batai shaphang ka projek ba ka don jingthmu ban shna iaki Morning Glory bad ka Labyrinth bad ula ong ba la buhthong ban sdang trei na trai jong ki bynta ka Kshaid Tyrshi haduh ha jingkieng Myntdu bad ruh ki bynta jong ki wahduid ba noh sha ka wah Myntdu kaba don ha Pynthornein.

Shuh shuh ki ophisar ka tnad Water Resource ki la iathuh ba kane kadei ka Project hap ban buh jingtyrwa sha ka Sorkar kmie, kumta donkam ban iaka jingmynjur jong ki nongioh myntoi khnang ban lah ban leh ia kaba donkam ha kaba iadei bad ka DPR bad kiwei kiwei ki kam shwa ban kut ka Financial year jong u snem 2023-24.

U Sylvester Phanbuh, MCS, Extra Assistant Commissioner, West Jaintia Hills ula ai lad iaki Waheh Shnong, ki trai hali kumjuh ki nongialam jong ka Pynthornein Farmers Association, Khooid Ya Ka Wah Myntdu ban ai jingmut ne pan jingshai ha kaba iadei bad ka Project.

Na ka liang ki Waheh Shnong, ki nongrep ha Pynthornein ryngkat ki nongialam ka Pynthornein Farmers Association, Khooid Ya Ka Wah Myntdu ki pdiang hun ia kane ka Project hynrei ki kyrpad jur iaki ophisar jong ka tnad Water Resource ba ymdei ban shna tang dep ne trei thurmur ia kane ka Project khnang ba kan long shisha ka jingkyrkhu iaki nongrep ka Pynthornein.