Pynkhreh ka WSCSC ban pynlong da ka Waikhyrwi Festival ha East Jaintia Hills

Syllad | The Rising MeghalayaNovember 11, 2022

Ka Waikhyrwi Social and Cultural Sports Club (WSCSC), Dkhiah West kala pynbna ban kan pynlong iaka Waikhyrwi Festival ha u Nohprah (December) jong une u snem ha Dkhiah West, East Jaintia Hills District.

Kane ka tamasa ka dei shibynta ban kyrsiew ia u paidbah ka thain ban tyngkai iaka jingbuh jingsat ka mariang. Ka matpdeng jong kane ka tamasa kalong “Save Green Save Life”.

U Secretary ka festival committee Ming Pale, ula iathuh ba ia kane ka tamasa yn pynlong arsngi ha Dkhiah West, kata haka 13 bad 14 tarik u Nohprah 2022.

“Ka jingthmu ba ngi pynlong ia kane ka tamasa ka long kum shibynta ban ialap pynneh pynsah iaka mariang, khamtam ia kito ki jaka ba paw ha ki jingthoh bad ki khanatang ka Bri u Hynniewtrep, la ong u Ming Pale.

Ula ong ba ka Waikhyrwi ka dei ka wah kaba don iaka khana u barim, kata shaphang ka Li dohkha bad woh Ryndi ka ieng haduh mynta. Kane ka wah ka sdang na Dkhiah ka tuid lyngba ki ba bun ki shnong ter ter bad tuid sha ka Wah Kupli.

Katkum ki khanatang, kiba bun ki kur ki jait ha bri u hynniewtrep ki mih na kane ka wah, la ong u ma Ming bad bynrap ba ka Waikhyrwi Social and Cultural Sports Club kala pynkhreh da ka documentary na ka bynta ka Wah Waikhyrwi bad ki khanatang ba don bad ka.

Ban pynshongshit ia kane ka tamasa ki kynhun tem na bar jylla bad ki trai shnong kin wan ban pynshongshit. Kan don ruh ka jingiai kjat trekking, drawing competition, ki jingialehkai u barim, ka jingiakop bhabriew bad kiwei kiwei.

Haka sngi Palei, u Additional Deputy Commissioner, East Jaintia Hills District Johnathan Shylla ula pyllait paidbah iaka poster jong kane ka tamasa. La iadonlang u general secretary ka East jaintia District Art & Culture Organization Coming One Joy Tlang.