Pynkhreh ki nongmareh thong na ka bynta ka “Sohra International Marathon” ka ban long lashai mynstep

Syllad | The Rising MeghalayaSeptember 29, 2023

Ka jingpynkhreh ia ka jingiakob mareh thong kaba ar ba la tip ia ka kum ka “2nd Sohra International Marathon” kan long lashai ka step 30 tarik Nailur 2023 (Sngi Saitjain) ka la long kaba iaid beit iaid ryntih ha kaba ki nongwan ban iashim bynta baroh, ki la phai la ki jong ki khmat ban ia mih madan bad ban poi sha ka thong ka jingjop.

Kum ban shu pyunkynmaw ba ia kane ka iakob mareh kaba ar, ka dei kaba la buria pisa da ka sorkar jylla lyngba ka tnat jong ka Directorate of Sports & Youth Affairs ka sorkar jylla ryngkat bad ka Meghalaya State Olympic Association.

Kane ka jingiakob mareh ka dei ruh kaba la ithuh pura da ka Athletics Federation of India (AFI), bad ka dei tang kane ka iakob mareh kaba la biang pura katta ka nam ka kyrdan iakob mareh kaba bna nam ha ka thain shatei la mihngi jong ka ri hi baroh kawei.

Ha kane ka kynti na ka liang kla Athletic Federation of India ka la  phah ym duna ia 30 ngut ki  briew ki jong ka, kum shi bynta ba kin pyniaid bad ba kin pynbeit ia kane ka jingiakob mareh kaba la phiah ha ki lai bynta, katta ka 21K, 10 K bad ka 5K.

Haba iakren bad ki lad pathai khubor, u Working President ka Meghalaya State Olympic Association u bah John F Kharshiing u pyntip ba ki nongiamareh na bar ri kiba la wan ban iashim bynta ha kane ka kynti kaba mynta ki long 6 ngut ba kynthup ia ki kynthei bad ki shynrang bad kine baroh ki dei napoh ka ri Kenya.

Kine ki kynthup ia ka Susan Chebet, u Elkana Kipkoech Runo, Richard Kiprop, u Elijah Kipruto Kemei bad ka Agner Mueni Mutua.

Kiwei pat ki nongiamareh ki dei na kiwei pat ki jylla jong ka ri India bad ki nongiamreh kiba dei na kane ka jylla. Haba khein kyllum ka jingdon jong ki nongwan iashim bynta mynta ka long palat ia ka lai hajar ngut.

U Bah John u pyntip ruh ba ka jingpynlut na ka liang ka tnat Sports haba pynlong ia kane ka jingiakob kam duna ia ka shi klur tam ka pisa, ha kaba ka thong haba pynlong ia kane ka jingiakob ka long ban iarap ia ka jylla ba kan kiew ha ka liang jong ka kam jngohkai ne tourism ha ka jylla hi baroh kawei.

Haba ia nujor bad u snem ba la dep, mynta ka kynti kane ka jingiakob kan long kaban pynsngewtynnad bha ia baroh ki nongiashim bynta, namar ba shi lynter jong ka  surok ban ia mare ha katta naduh  ba sdang ia ka 21K ka shnong Laitsohpliah ka surok ka la long kaba biang bha namar ba la dep ban siang rong thymmai.

Nalor katta  kane ka jingiakob mynta ka  kynti ka la sei ruh ia kiba bun bha ki nongiashim bynta  khamtam ki khynnah bad ki samla kiba dei na ka ka shnong Sohra bad na ki shnong kiba marjan bad ka.

Nalor kata u Bah John u pynpaw ruh ba katba nangmih ki snem ka MSOA bad ka  tnat Sports ka iai don ia ka thong ba da kumno kan lah ban nang kham pynbha ia kane ka jingiakob bad u kyrmen ba ka jingiarap pisa kan  ym da dei than shuh tang na ka liang ka sorkar jylla, hynrei yn hap wat ban pyrshang ban ioh ia ka jingiarap pisa wat na ki kompeni.

Sa shisien u bah John u pynkynmmaw ba na ka bynta kane ka jingiamareh kaba lashai ka sngi ki paidbah shipor kin hap ban long kiba iai shah namar ba kan don ka jingkhang iaid ia ki kali na Shillong-Sohra, Sohra sha Shillong kaban treikam naduh ka por 6 baje mynstep haduh 9 baje mynstep.

Ha kane ka jingiakynduh bad ki nongthoh khubor nalor u bah John la iadon lang ruh u bah P. Laloo Vice President MSOA bad u G krishnan, u dkhot nongpyniaid na AFI.