Pynkhreh ki paid Sikh ka jylla ia ki jingthiah bad oxygen naka bynta ki briew ba ioh ia ka jingpang COVID-19

Syllad | The Rising MeghalayaMay 1, 2021

Ha ka khyllipmat jong ka jylla bad khamtam lei lei ka nongbah kaba la iakhun ia ka jingsaphriang ka khlam jingpang Coronavirus ne COVID-19, ka khubor kaba sngewtynnad ka long ba ki paid nong shnong Sikh ne ki Punjabi ba don ha ka nongbah Shillong, da la ka mon sngewbha ka jong ki, ki la buh mynta ia ki jingthiah bad kumjuh ia ki ktang lyer ne ki oxygen, hapoh ka Auditorium jong ka Gurudwara ka Shri Guru Singh Sabha ba don mar shilliang ka Iing u Lat ka jylla.

Ka jingbuh ia kine ki jingthiah ryngkat bad ki oxygen,m ka long kum shi bynta ba kine ki kynhun ba don ha kane ka jylla, ki kwah ba kin pynpaw sha ka pyrthei ia ka jinglong ba kloi lem ka jong ki ban kit ban bad ne ban iarap ban tynrong lem ia ka jingeh ba ka jylla ka ia kynduh, khamtam lei lei haba shem bad iohi ia ka jingiai kiew sted jong ki briew kiba ioh ban kem ia ka jingpang Covid 19, kaba sa shisien ka la wan ba kan lynsher ha kane ka jylla ha ka sien kaba ar.

Haba iakren bad u Syllad na ka liang ka jong u Dr Kamaljit Singh Sehdava, ba dei artad u General Secretary jong ka Shi Guru Singh Sabha, u iathuh ba kane ka jingpynkhreh lypa ka jong ki, ka long ba kin lah ba kin ai ia  I lad jingiarap iba ki lah ban ioh ei, ia kaba ia kane baroh la lah ban leh da ka jingiakynshew pisa hapdeng para paid nong shnong shnong jong ka jylla.

Shuh shuh u Dr Kamaljit u iathuh ba ka jingbuh ia ki jingthiah bad ki oxygen ha kane ka jaka, ka long ban plie lad lem ia kino kino ki paidbah khlem da niew ne khien jaidbynriew ne sngewpher ka jait ka niam ne ka kynja, ba lada ki sngew donkam ban ioh ia ka oxygen, ki lah ban leit ha katei ka jaka ba ki la pynkhreh ia ba ki lah ban ioh ia ka lad ban shah sumar shipor, bad ynda haba ki la sngew lah ring mynsiem suk, ki lah ban leit phai sha la ki iing ki sem.

“Ka jingbuh ka jong ngi ia kine ki jingthiah bad ki oxygen, ka long ban ai ia ka lad jingiarap ba kyrkieh ia kino kino ki briew kiba donkam, hynrei ngi kren shai ba ngin nym lah da lei lei ban shim ia ka jingkit khlieh kaba ngin sumar ne ban ai dawai ha kane ka jaka” la bynrap u Dr Kamaljit.

Ha kane ka jaka, yn don lang ruh kumba kato katne ngut ki doctor ryngkat bad ki para medical kiban iarap ia ki riew paidbah ba kin ioh ia ka lad jingiarap kaba shipor bad kine ki nongiarap bad ki doktor ki dei kiba la kloi nalade ban wan shakhmat ban khreh ban ai jingsumar ia kino kino ki paidbah kiba  donkam shisha ia ka lad jingiarap ha kum kane ka por jong ka saw ka sian.

Haba  kylli hato kane ka jingpang Covid 19 kan iai bteng ba kan khie ne ban jur bha ne em ha kane ka jylla kumba long ha kiwei pat ki bynta jong ka ri, u Dr Kamaljit u ong ba kumba ka long ia mynta yn nym lah satia ban batai, hynrei u sngew pat ban pynpaw ba ka sien jam ba ka sorkar jylla ka la shim naka bynta ban pynjari biang ia ka jingpyrkhing (Containment Measuers) kaba 10 sngi, khlem pep kan don ka jingteh lakam ia ka jingsdang ban pur sted jong kane ka jingpang hapdeng para briew.

Ha kaba kut u Dr Kamaljit u iathuh ba ka kynhun ka jong u ka la pynkhreh ba kan wanrah ruh sa ia artylli ki kor (Oxygen Generator) kaban dang wan poi ha ka taiew kaban wan napoh ka jylla Gujarat, khnang ba yn lah ha kaban iarap lem ia ki bor sorkar kiba don biang sa shisien hapdeng ka jingiakhun ia ka jingwan lyngshop ha ka sien kaba ar jong ka Coronavirus ne ka COVID-19.