Pynkhreh kyntiew kyrdan iaka Khliehriat CHC, iaid shait shait ka jingshna Oxygen Plant

Syllad | The Rising MeghalayaMay 20, 2021

Ka jingwan sar ka khlam COVID-19 ka lah ban pynurlong iaka jinganngud ki paidbah ka East Jaintia Hills District ban ïoh iaka Civil Hospital kaba pura.

Ka Khliehriat kaba dei ka headquarter jong ka East Jaintia Hills District mynta ka don iaka Khliehriat CHC kaba don 100 jingthiah bad ka sorkar kala pyrshang ban wad jaka ban shna noh iaka Civil Hospital kaba pura.

U Kyrmen Shylla MLA ka thain uba long ruh u Myntri Sorkar jong ka sorkar kaba ialam ka NPP, ula iakynduh ia u Dr Aman War, DHS (MI) ban iakren halor ka jinglong jingman bad ka jingpynkhreh ban ïakhun iaka khlam COVID-19 haka district haka sngi Palei.

U Ma Kyrmen ula iathuh ba la iakren ban pynbiang iaki doktor ki nurse bad kiwei kiwei ki nongtrei haki jaka sumar.

U Ma Kyrmen ula ong ba u DHS ula pynthikna ban pyndep noh iaka Oxygen Plant ha Khliehriat CHC hapoh 5 tarik u Jylliew. Nalor kata kane ka jaka sumar kala ioh kawei ka ambulance bad ka tnad ka koit ka khiah kan pyrshang katba lah ban pynioh ambulance ha kine ki khyndiat sngi.

U Ma Kyrmen Shylla ula pynpaw ka jingsngewnguh kaba khraw ia baroh ki briew kiba hakhmat kiba don bynta ban ïakhun iaka khlam COVID-19 ha district wat hapdeng shibun ki jingtynjuh kaba ki iakynduh. Ula ai khublei kyrpang iaki doktor ki nurse haki PHCs bad kiwei kiwei kiba la shimkhia iala kam kaba la bynshet khamtam ban iakhun iaka khlam.

Ula kyntu ia paidbah nongshong shnong ka East Jaintia Hills District ban bud ryntih ïaki adong adit ka khlam COVID-19 bad ban kiar na ka leit ka wan bad kumjuh ban shong khop ha iing ban tem iaka jingpur ka khlam. Ula kitbok kitrwiang ruh ia kiba iabit iaka khlam ba kin ioh iaka koit ka khiah kaba pura.