Pynkhreh pura ki bor Sorkar na ka bynta ka concert u Ed Sheeran ha JN Stadium Polo

Syllad | The Rising MeghalayaFebruary 11, 2025

Na ka liang ki bor sorkar ki la pynkhreh pura ha kaba iadei bad baroh ki jingdonkam na ka bynta ka concert jong u nongrwai ba pawnam ka pyrthei u Ed Sheeran ka ban long ha ka 12 tarik Rymphang ha JN Stadium, Polo.

Haba kren sha ki lad pathai khubor ha ka 10 tarik Rymphang, ka Deputy Commissioner ka East Khasi Hills ka Kong RM Kurbah ka la ong ba haduh kumba 26,000 ngut ki briew la khmih lynti ba kin wan sha kane ka concert bad ia baroh ki jingdonkam la dep ban pynkhreh lut nadong shadong.

“Ia ki khyrdop ngin plie ha ka por 4 baje janmiet. Ngi don khyndiat ka jingsngewkhia namar ki don tang artylli ki jaka rung. Na kata ka daw ngi la khot ia kane ka jingialang ban pyntip sha baroh kito ki briew kiba wan sha kane ka concert ba kin wan kham kloi khnang ba kan ym don ka jingiaknieh rung,”ka la ong. Ka la ong ruh ba kin don laitylli ki khyrdop ba la pynkhreh ban mih na kane ka concert.

“La khang ia ki khynnah kiba hapoh ka 5 snem rta ba kin wan sha kane ka concert,” ong ka Kong Kurbah haba pyntip ba ki nongleit concert ki lah ban rah tang laitylli ki tiar, kata ka mobile phone, ki shabi bad bek pisa.

Haba kylli, ka DC ka la ong ba ki bor District kim don jingthmu satia ban khang ia ki skul namar ka concert bad bynrap da kaba ong, “Hynrei ngi hap ban pyrkhat lypa ban pyllait ia ki samla pule ba kin lait na ka jingsahkut. Ngi kwah ban kiar na kane bad dei na kata ka daw ngi la pyntip lypa ia kane.”

Ha kaba iadei bad ka jingpyniaid kali, u Superintendent of Police ka District Bah Vivek Syiem u pyntip ba kan don ka jingkhang rung kali ne No Entry ha kiba bun ki jaka, bad kine ki kynthup ia ka No Entry na Lad Lumjingshai sha lad CRPF Camp, Polo, na Lumjingshai sha Police Colony, Lawmali sha Polo, Golflink sha Polo, City Hut Dhaba sha Polo, BJP office sha Oakland, Polo, BK Bajoria sha Fourth Furlong, Gurudwara sha St Anthony’s college.

Ha kaba iadei bad ki jaka pynieng kali, u SP u la ong, “Ngi don katto katne ki jaka ha kaba ki paidbah ki lah ban pynieng ia ki kali jong ki. Kine ki jaka ki dei ka Red Field, Golflinks, pynieng harud surok na TRS Restaurant sha CM Connect office, pynieng harud surok ha ka thain Golflinks, FCI junction sha Lumjingshai junction, State Central library campus bad State Convention campus.”

Katba halor ki bor pahara, u Bah Vivek u la ong ba kin don lai bynta ki jingtalasi hashwa ban rung shapoh stadium. U la ong ba ki pulit kin peit ia kine ki jaka ha ryngkat ki bor pahara jong ki nongpyniaid.

Katkm ka jingpyntip na ki nongpyniaid  concert, ka jingplie ban sdang ia kane ka concert kan long ha ka por 6:15 janmiet jong ka 12 tarik Rymphang.