Pynkhreh thaw EC ka VPP ha KHADC; ka jingpyndonkam bor ka la ktah ia ka party ha Jaintia HIlls: Ardent

Syllad | The Rising MeghalayaFebruary 25, 2025

U nongialam ba hakhliehduh ka Voice of the People Party (VPP) u Bah Ardent Miller Basaiawmoit u la ong ba ka party jong u kan ialam hi marwei ia ka Executive Committee (EC) kaba thymmai hapoh Khasi Hills Autonomous District Council (KHADC) hadien ba ka la tam ia u nombor ha ka jingpynbna ia ka result na kane ka elekshon kaba dang shu dep hynne ka sngi 24 tarik Rymphang.

Ka VPP ka la jop haduh 17 na ki 29 tylli ki seat hapoh KHADC bad kylla long ka party kaba jop bun tam. Hynrei kane ka party ka la jop tang 8 na ki 29 tylli ki seat ha Jaintia Hills Autonomous District Council (JHADC).

“Nga sngewkmen shibun ba ngi la ioh ia ka jingjop kaba donburom wat hapdeng kiba bun ki jingtynjuh kiba ngi mad ha kane ka elekshon ha kaba la kynnoh ia ngi ba ngi long pyrshah ia ki Rangbah Shnong, ki lad pathai khubor nalor ka jingiakhun ia ka bor jong ka pisa. Ngi sngewkmen ba ki paidbah ki sngewthuh namar ngi kwah tang ban pynthikna ia ka jingsynshar kaba khuid bad ka jingialeh ka jong ngi kam dei pyrshah ia ki Rangbah Shnong ne ki lad pathai khubor. Kumta, ngi ainguh ia U Blei bad ngi ai khublei ia ki paidbah halor ka rai kaba ki la ai.Kane ka dei tang ka jingsdang,” ong u Bah Ardent.

Une u nongialam ka VPP u la pynbna ruh halor ka rai jong ka party ban thaw marwei ia ka EC ha KHADC.

“Ngi trei tang marwei hi bad lada kiwei ki kwah ban kyrshan ia ka EC ngi pdiang sngewbha hynrei kan ym don kano kano ka jingiateh bad kino kino ki seng sain pyrthei,” u la ong da kaba bynrap, “Ngi pdiang sngewbha tang ia ka jingkyrshan kaba khlem kyndon ym ki jingkyrshan ryngkat ki kyndon.”

Ha kaba iadei bad JHADC, u Bah Ardent u la ong, “Ngin sa shim ia ka rai kaba dei ha ka por kaba biang.” “Ngim don kano kano ka jingthmu ban iatehlok.Ngin sa iakynduh kum ki nongialam ka party bad ngin sa shim ia ka rai kaba dei,” u la bynrap.

Ha kajuh ka por, une u nongialam ka VPP u la kynnoh ba ka jingpyndonkam bor ka ka ktah ia ka jinglah jong ka party jong u hapoh Rilum Jaintia.

“Ngam sngewkmen namar ki briew ha Rilum Jaintia kim shym la iohlad ban iashim bynta ha ka elekshon kaba khuid bad kaba iaid beit iaid ryntih ha kiba bun ki shnong. Kane ka dei ka dawbah balei ka party jong ngi kam lah ban long ka party kaba jop bun eh ha JHADC. Jin da la pynlong ia ka elekshon ha ka rukom kaba iaid beit iaid ryntih kumba long ha KHADC, ngim artatien ba ngin jop na JHADC,” u la ong.

“Ngim khuslai halor ka bor jong ka pisa, hynrei ka jingpyndonkam da ka bor pyntieng pynsmiej ka la ktah jur ia ngi ha kaba ki Dorbar Shnong ki la byrthen, kumta kam don ka jingiaid beit ha ka jingpynlong ia ka elekshon. Ngi la ai ia ka thup kyrteng jong ki polling station kiba don jingma na ka jinglah ban mih ki jingklumar hynrei ym shym la pyrkhing pahara ha kiba kum kine ki polling station,” ong u Bah Ardent da kaba kynnoh ba ka jingbym lah jong ki bor pyniaid District ban shim ia ki sienjam ka lam sha ki jingjia jong ki kam thombor bad pynjot pynpra ha ki saw tylli ki polling station ha ki artylli ki constituency hapoh East Jaintia Hills district.