Pynkhuid ka Shnong Panaliar ïaka Syntu Ksiar

Syllad | The Rising MeghalayaMay 30, 2022

Ki nongshong shnong ka shnong Panaliar ryngkat bad ka jingïatreilang ka Panaliar Tourism & Environmental Development Society kila ïa mih paidbah ban pynkhuid ïaki bynta ka wah Myntdu ha Syntu Ksiar haka sngi U Blei.

Ia kane ka jingpynkhuid la pynlong hadien ba ki bynta ka Syntu Ksiar kala shah pynriam da ki plastic ba bun rong bad kiba la ieh ka umsaw naka jingshlei um haka taiew ba ar jong u bnai Jymmang mynta u snem.

Ki nongshong shnong ka Panaliar kynthei bad shynrang hapoh ka jingialam u general secretary ma Careme Phawa kila mih paidbah ban pynkhuid ia katei ka bynta jong ka Wah Myntdu.

Ka jingthmu ka shnong Panaliar ban pynkhuid ïaki bynta ka Wah Myntdu haka bynta jong ka Syntu Ksiar ba hap hapoh u pud u sam jong ka shnong Panaliar ban pynneh iaka jingkhuid jingsuba ka jaka kala khring ïaki nongwan kai suwari kiba najan najngai.

U Waheh Shnong Panaliar U Ma Riquoma Rq. Laloo ula ai khublei ïaki khun ka shnong khamtam ki nongkitkam shnong kiba la ai ka jingïatreilang na ka por sha ka por ban pynbha pynmiat ïaka shnong ka thaw.

Ula kyntu ïaki nongshong shnong bad ia baroh ban shim iaka jingkitkhlieh ban pynneh iaka jingkhuid jingsuba ka Syntu Ksiar.

Ula pyntip ruh ba ka shnong kala mana bad khang pyrshah ïa kino kino kiba wan ban pyntngit ne pynjakhlia haki bynta ka Syntu Ksiar kaba long kawei na ki jaka kaba la ñiew kyntang.

La khang ban khwai dohkha ha thwei Syntu Ksiar ne ka Fish Sanctuary, kaba ka Jaintia Fishing and Environmental Protection Association (JFEPA) ryngkat ka tnad Fishery kila ai iaka jingiada ia ki doh um dohpnat. Ula ong ba kino kino kiba leh pyrshah yn daiñ kuna bad pynshitom katkum ki aiñ shnong.