Pynkhuid ki khynnah skul ia baroh kawei ka shnong Sohphoh

Syllad | The Rising MeghalayaApril 9, 2021

Ki khynnah skul jong ki 4 tylli ki skul kiba don hapoh ka shnong Sohphoh ba kynthup ia ka RCLP School, Saw Balang Presbetarian U P School, Sohphoh Govt L.P School bad ka Bamjatap SSA L.P School kila pynkhuid iaki surok bad ki lynti synkieng ha baroh kawei ka shnong Sohphoh haka sngi Thohdieng.

Kane ka jingpynkhuid shnong kaba kum kane kan dei ka sien kaba nyngkong ha kane ka shnong  Sohphoh bad kine ki skul kila buh ka thong ban pynkhuid manla u bnai.

U Bah Foster Kharsahnoh Secretary ka Shnong Sohphoh, ula ong ba ka shnong ka angnud ban jop iaki jaboh plastic bad kila pyrshang ban buh ia ki dusbin ha man ki dong ki lad bad ruh ha shi lynter ka surok bad ka shnong baroh kawei kala nang ioh mynsiem hadien ba ki bor pyniaid jong kine ki skul, ki nonghikai bad ki khynnah skul kila tynrong halade iaka jingkitkhlieh ban pynlong iaka shnong kaba khuid kaba suba.

Ula ong ba ki khynnah skul bad ki nonghikai jong kitei ki skul kila mih sha surok bad shimbynta shitrhem ban pynlong ia kane ka jingpynkhuid shnong.

U Bah Kharsahnoh ula ong ba nakaliang ka Dorbar Shnong Sohphoh, ka ai khublei kyrpang iaki bor pyniaid skul kine ki saw skul bad ki nonghikai kiba la iatreilang bad ka shnong.

Ka shnong kala kyntu ruh ia baroh kiba nabar shnong bad ki trai shnong ban pynneh iaka jingkhuid jingsuba ka shnong khnang ban nym theh umpjah iaka jingangnud ki khynnah skul bad ka shnong ban wanrah iaka jingkhuid jingsuba hapoh shnong poh thaw.