Pynkhuid lynti synkieng ka KSU Nartiang Moodop Unit, buh tin bret ñiut ka KSU Ummulong Unit

Syllad | The Rising MeghalayaDecember 23, 2020

Ka Khasi Student Union (KSU) Nartiang Modop Unit mynta ka sngi ba ar ka la pynlong ïaka jingpynkhuid ïaki lynti ki synkieng ha ka shnong Nartiang katba ka KSU Ummulong Unit ka la wah ïaki tin bret ñiut haki lynti ïaid kjat jong ka Shnong Ummulong khnang ba ki nongshong shnong bad ki nongleit nongwan lyngba ka surok bah kin ïoh ban bret ïa ki ñuit ki ñier jong ki.

Kane ka jingpynkhuid lynti synkieng la sdang shwa na ki lynti synkieng jong ka Modop pynbud shaduh sha ïew Nartiang kaba la ïashim bynta lang da ki nongïalam Shnong jong ka Nartiang bad Modop.

Hashwa ban ïashim bynta haka jingpynkhuid ka la don ka jingïalang lyngkot ban pynshai bad pynsngew thuh ïaki nongshong shnong shaphang ka jinglehkhuid kaba la pynlong ha Community Hall jong ka Shnong Modop haka jingïadonlang u Waheh Shnong ka Modop u Bah Dawyo Dkhar, u Secretary Shnong u Bah Edriasly Pale, u Dr. R Pohsnem nalor kiwei de ki nongïalam shnong bad ki dkhot nongkitkam ka KSU Nartiang Modop Unit.

U Waheh Shnong u Bah Dawyo Dkhar haka jingkren u pynpaw ka jingsngewkmen ïaka KSU kaba don ka mynsiem pyrkhat jngai ban ïarap da kaba pynkhuid pynjnger ïaka shnong ka thaw bad kitbok kitrwiang ruh ïaki dkhot nongkitkam jong ka KSU ba kin nangai ka jingshakri kaba bha tam sha ki paidbah nongshong Shnong.

U Bah Hamkom Khyriem u riew rangbah ka Shnong haka jingkren ula ong ka KSU kadei ka seng kaba la ïaid bha shakhmat haka jingshakri ïaka ri bad ka jaitbynriew hynrei wat la katta dang don shibun ki mat (issue) kiba hap ban ïakhun na ka bynta ka roi ka par kumta ula kyntu ïaki dkhot nongkitkam ban don ka mynsiem kaba shlur ban ïaid shaphrang khnang ba ka jingthmu ba bha jong ki kan poi sha ka thong.

U Shaniahskhem Dkhar incharge Nartiang uba long ruh u Assistant Finance KSU Jaiñtia Hills ula pynpaw ba jingthmu bad ka thong ban pynkhuid shnong ka long shi bynta ban ïalam lane pyni sha ki paidbah nongshong shnong ba ka jingleh khuid kadei kaba kongsan la ha ki iing ki sem kumjuh ka shnong ka thaw.

U Dr. R Pohsnem ula kyntu ïaki nongshong Shnong ba kin ïada ïalade da kaba pynmlien ban deng ïaki mask haki jaka paidbah namar ka khlam kam pat kut ula batai ruh shaphang ka Swaach Bharat Mission kaba la sdang da u Myntri Rangbah duh ka ri u Narendra Modi bad shibun kiwei pat ki mat jinglehkhuid.

Ha kane hi kajuh ka sngi ka KSU Ummulong Unit hapoh ka jingïalang ki dkhot nongkitkam ba kynthup ïa u Ban Lyngdoh, u Fullmoon Pyngrope, u Damehi Muksor kumjuh ki nongïalam Shnong ki la leit ban wah tin bret ñiut haduh 40 tylli ha ki lynti synkieng jong ka Shnong Ummulong.