Pynkhuid shnong ka Namdong B, khang ka shnong ban buh maw shyiap ha lynti iaid kjat

Syllad | The Rising MeghalayaAugust 14, 2024

Ka Dorbar shnong Namdong-B haka 12 tarik Nailar kala pynlong iaka jingpynkhuid shnong paidbah ha ha  baroh kawei ka shnong haka jingialam u waheh shnong ma DS War bad ki nongkitkam shnong.

Ha kane ka sngi ki paidbah kila mih ban shimbynta ban pynkhuid la ki jong ki dong, ki lynti ki syngkieng.

Shuwa ban sdang ka jingpynkhuid shnong kala don ka jingialang kaba lyngkot ha kaba u waheh shnong ula pynshai paidbah iaka jingkongsan ban lehkhuid bad iakhun iaki jaboh plastic.

Ula ong ba ka dorbar shnong kala rai ba nangne shakhmat ba baroh ki longiing kiba don iing harud surok kim bit shuh ban lum thup iaki maw ki shyiap ha lynti iaid kjat bad kumjuh ki dukan kim bit ban buh iaki mar ki mata ha lynti iaid kjat khnang ba kan ym khang iaka lynti ne pynthud iaka iaid ka ieng ki briew, ki khynnah skul lyngba ki lynti iaid kjat.

Ula ong ba ka jingbuh iaki mar bad ka jinglum thup iaki maw ki shyiap ka khang iaka lynti kumta la kyntu ia baroh ban pynkhuid barabor iaka lynti iaid kjat ban lait na kino kino ki jingjia kiba sngewsih.

Ka dorbar shnong kala kyrpad ia baroh ki nongshong shnong bad ki marjan shnong ban ai iaka jingiatreilang ban pynlong iaka shnong ka thaw kaba khuid kaba suba.